安排 Honeymoon

 

結左婚咁耐, 終於肯的起心肝安排honeymoon既事, 尋日終於book 左啦, 地點係北海道, 我哋決定自由行, book 左七日六夜, 但行程仲未諗呀, 要加把勁啦~~

完成大Project

 

籌備左年幾既大Project 終於完成, 總算一切順利, 雖然唔可以話好完美, 例如時間control 得唔係太好, o係酒樓時因為用左好多時間斟茶俾長輩, 經常令到等影相朋友排長龍, 甚至竟然安排漏同事上台影相, 因為個人真係好亂, 無晒思想, 真係勁唔好意思. 但尋日發生既一切都令我一生回味無窮, 好開心好感動.
遲下會post 返婚禮後記, 對每一間公司既感想~~

過大禮

 

今日過大禮, 不過有少少阻滯, 話說訂過大禮既物品係o係某粉嶺街市, 之前上網做research時, 見到其中一個網友話o係佢屋企附近訂過大禮用品, 咁就問左佢d資料, 咁之前我同我男友都去睇過, 咁個老闆娘又nice, 好似幾好人咁, 而佢哋既package 平金都少少, 同埋我諗住我屋企係大埔, 去粉嶺攞方便過去金都攞啦, 所以就o係o係粉嶺訂, 本來約左大概今日十點半到去佢哋街市到攞, 尋日都諗住打俾老闆娘confirm時間, 點知打左第一次無人聽, 之後再打直頭唔通, 都有小小驚驚哋架啦, 到今朝九點幾再打俾老闆娘, 問佢係咪十點半可以去攞, 佢答我話唔得喎, 要一點喎, 我話: 吓, 唔得喎, 我過大禮吉時係11-1pm, 你一點俾我都過晒吉時啦, 之後佢話再覆返我, 然後佢覆返黎話12點直接送黎大埔, 我唯有信佢啦. 中間不斷俾d長輩"哦"話我哋之前又無約清楚呀, belubalu, 另外因為男友約左六個親友幫手過大禮, 又要不斷約佢哋改時間地點等, 亂晒籠, 最後好在老闆娘一個人拎住四籃野都趕得切十二點四到送到俾我哋, 最後我男友d親戚一行六日十二點半到上到黎過大禮, 我就o係房等, 我男友就o係我屋企樓下等, 總算大驚無險~~

 

 

買紅酒 + 兄弟姊姐聚會

 

今日放工約左上網上出名既夏生"新翹行"試紅酒, 不過我唔識試, 所以都係我男友同其中一位兄弟幫手試, 佢哋都試左好多, 最後揀左"Frontera Merlot 2008 (Chile)" 因為酒樓每圍送一支紅酒, 所以我哋只係訂左28支, 唔洗回收就每支$47, 要回收就$49, 男友話應該實飲得晒, 飲唔晒留返自己飲, 所以唔洗回收啦, 仲要直接送去酒樓, 正!
之後就約左成班兄弟姊姐食飯, 雖然大家都係第一次見, 但氣氛都幾好吖, 希望大家o係big day o個日都玩得開開心心啦~~

唐餅 - 榮華

 

本身我哋唔諗住買唐餅, 因為我媽媽話唔洗派, 但係男家話過大禮一定要買唐餅, 所以本身諗住今個4號既婚紗展自己或者託朋友去買, 點知之前經過榮華, 見到寫住臘腸 13-15 Nov 做買二送一優惠, 咪八卦問吓咁中式唐餅有無呢個優惠, 咁個店員話中式餅券有八折, 所以我就無去婚紗展買, 等到今日去買, 本身一心諗住買餅券, 點知尋日o係旺角間榮華見到原來散裝唐餅都有做買二送一優惠架, 但係旺角店得返一兩個剩囉, 所以諗住博吓今日會唔會有, 今日出左尖東間榮華, 有散裝賣, 店員話買一個都有折, 都有六六折, 等如買二送一, 勁抵
龍鳳禮餅盒 原價:$55  特價: $36.7
紅綾蓮蓉酥 原價:$12.5  特價: $8.4
蛋黃白蓮蓉酥 原價:$16.5  特價: $11
黃綾豆蓉酥 原價:$10.5  特價: $7
白綾伍仁酥 原價:$10.5  特價: $7
欖仁合桃酥 原價:$12.5  特價: $8.4
我哋差唔多掃晒佢哋d唐餅, 哈哈~~

 

拎帖

 

早兩日Joy's card 打黎話d帖拎得啦, 好有效率喎, 兩個禮拜就攪掂, 落單時又話要一個月既, good, 可以開始造炸彈啦, 雖然未有咁快派得住, 整定先都好吖~~

DIY 結婚証書套

 

今日放假, 終於的起心肝DIY 個結婚証書套啦, UM, 都搞左我成日呀, 同埋都整得唔係幾靚, 不過都係O個句, 係獨一無二的~~

內頁:

 

揀奶奶衫同轉褂款

 

今日同未來奶奶去名褂禮服揀埋最後一件奶奶衫, 試左幾件, 淺色既都唔啱未來奶奶, 之後佢試左件銀灰色既, 大家都眼前一亮,覺得呢件著得佢高貴啲, 原來呢件係要加錢的, 加左$300~~
之後就問返佢個staff, 因我覺得之前我揀o個件褂好似清得滯, 無乜金線,睇吓可唔可以轉款, 佢俾左一件我試, 呢件真係多金線好多, 又係波浪腳, 同埋新淨好多, 感覺紅d, 個staff 話因為呢件係新既, 我鐘意呢件多好多呀, 所以就轉左呢件啦~~

生命最後一個月的花嫁

 

今日同男友去左睇"生命裡最後一個月的花嫁"

本身都有睇本書, 睇書時我都已經有喊, 有時搭車睇仲好尷尬添, 無理由o係車箱度喊, 都要死忍~~
睇戲更加啦, 根本由中斷到開始喊到散場, 無停過, 我唔知其他人有無我咁誇張, 但係真係忍唔住, 我覺得個男主角真係好好, 女主角個爸爸又好慘~~

 

 

 

DIY 花車佈置

近排成日上網睇吓有咩可以自己DIY, 一來可以慳返少少, 二來自己整完好有滿足感架, 雖然唔係話好靚, 但係自己親手整, 獨一無二的~~

DIY 花車佈置~~ 之前O係金都睇過吓, 一SET 要成二, 三百蚊, 我而家買材料都唔洗五十蚊~~

 

遲D會再整埋兄弟姊妹花車蝴蝶, 花女花球, 簽名筆同埋結婚証書套, 我諗呢個會最難整~~

去花園街伯伯度買絲花

 

今日出左旺角花園街伯伯度買絲花, 諗住買黎DIY 簽名筆同花女用花球, 一去到好多菲傭o係度揀緊花, 非常多人, 最後揀左呢堆花, 埋單$70~~

 

中秋節 + 深水埗德祥買DIY 用品 + 印帖

今日去左深水埗德祥買左d DIY用品, 都幾多野睇, 有D都幾平

戰利品:

 

 

之前去鴻星拎左D 帖返黎,

 

 

雖然d 帖唔算靚, 不過都唔諗住買過第二d 款, 帖d人睇完就掉架啦, 所以都唔諗住嘥錢o係呢個項目, 今日拎左D 內頁去 Joy's Card 度印~~

北上筍崗及百合隆買結婚用品第二回

幾個月前上左筍崗同百合隆買左d結婚用品, 但係發覺都係未買齊, 所以今日又上多去一次, 我哋今次無搭的士, 試吓搭巴士,d車其實黎得好密, 我諗五分鐘一班到, 因為我哋一去到就走左班車, 但即係有架車到,  其實都幾ok喎, 有位座, d冷氣又夠, 20分鐘車程到, o係帝豪酒店落車, 去o個程RMB3, 回程RMB2 (我都係上左車俾完錢先知回程係2蚊, 但我哋已經入左6蚊落去, 真係蝕左, o係大陸2蚊都買到d靚野, 陣間再講) 其實回程本身想搭的士既, 但好多人截的士, 唔夠人爭, 最後都要搭巴士~~

以下係戰利品:

 

我開頭去左上次我買野間立興先既, 但都好多人, 可能因為網上好多JM 介紹, 我拎起對褂鞋問幾錢, 老闆娘答RMB35, 因為我之前做過research 有d JM買30蚊, 所以我無第一時間o係立興買野, 行吓先, 行吓問吓, 問左有一間褂鞋賣30蚊, 我就決定o係呢間買勒, 呢間叫"飛雁精品店"
cushion 25/對連芯, 香港賣46蚊,
淨色絲帶紫色RMB2.5/卷, 金銀色RMB5/卷,
花車用紗RMB10 (呢卷立興開價RMB12),
子孫桶RMB7,
囍字貼大size RMB7 (呢隻款我o係立興買中size RMB8, 真係唔抵),
花瓣RMB3/120塊,
買左個紅色紗網諗住放米o個d, 佢間鋪頭入面本身無貨, 個哥哥仔特登就入倉幫我搵一個咁大把, 佢真係唔話得 RMB1,
利是封RMB0.8/6個
想買埋簽名筆既, 但佢哋度無得賣, 都係返去立興買, RMB3/支, 一扎綁貼用金繩RMB25
一卷銀色紗RMB25/卷 (呢D我真係唔知抵唔抵, 不過我問過一間開價RMB38, 所以真係要勁格價)
熱溶槍開頭個老闆開RMB15, 我又係上網做research 見人哋買10蚊, 就同佢講人哋買10蚊咋喎, 佢就話咁10蚊啦, 所以大家北上買野之前一定要做定research 唔好俾人呃呀~~
絲花RMB10/札
另外, 呢兩隻杯, 2蚊一隻, 我覺得好靚喎~~

 

 

 

遞交擬結婚通知書+8號風球的日子

 

尋日同男友去左沙田婚姻登記處遞交擬結婚通知書同揀註冊時間, 我上網預約時係10號籌, 登記時間係10:15, 我哋9:45到, 第8個揀時間, 咁即係有兩pair人無黎啦, 但係都要10:45先到我哋, 我哋本身心水時間係2-3點, 點知原來星期日得一個hall 開咋, 前面o個7 pair 都揀晒2:00 - 3:15既時間, 最早都係得返3:30, 如果唔係得返朝早, 朝早實唔得la, 又出門又去男家拜神, 所以最終都係揀左3:30, 再諗諗去唔去酒樓先註冊囉, 考慮吓先啦~~
之後再宣埋誓就搞掂lu, 我男友唔識讀"訛"呢個字囉, haha, 要個staff提佢, haha~~
今日請左半晝, 點知今日颱風"巨爵"襲港, 下晝4點天文台通知6點會掛8號波, 但公司同事無人敢走, 等老細4:30時走出黎叫我哋走我哋先敢閃咋, yeah早左放工, 即係約埋男友同佢d同事打牌, 打到12點先散水, 走o個時橫風橫雨, 都好驚~~
個8號波掛到今朝10:15, 我都成10:30先起身返工, 返到公司都成12:20, 洗吓杯開吓電腦都已經12:30, 就食lunch, 好心天文台遲15分鐘先改掛3號la, 咁咪可以食埋lunch先返公司囉~~
仲有好在我哋唔係今日揀註冊時間咋, 唔係就麻煩, 又唔知點安排~~

倒數三個月

 

仲有三個月咋, 好想時間快d過呀~~
粉紅色 = 未完成

婚禮日期：	2009年12月13日 (星期日)
註册地點：	未定, 預計婚姻註冊處註冊
婚宴地點：	海港城鴻星
婚妙／婚禮當日攝影
婚紗相：	羅浮宮(酒樓送coupon , 7/Nov 影 , 26/Feb 取)
	法國 (8/May 影, 20/Aug取)
婚禮當日攝錄：	Wedding Season 新婚天地
新娘
婚紗／晚裝：	羅浮宮 (1婚紗/3晚裝)
裙褂：	名褂禮服
頭飾及飾物：	羅浮宮提供
花球：	Agnes b
化妝造型：	Gipsy
婚紗鞋及褂鞋：	有利鞋店, 褂鞋未買
新郎
禮服：	羅浮宮 (2套)
恤衫：	已買1件
皮鞋：	已買
伴娘／姊妹服裝：	金都松柏
媽媽／奶奶服裝：	名褂禮服
爸爸／老爺服裝：	未諗
兄弟服裝：	未諗
兄弟襟花／姊妹手花：	未諗
接新娘／註冊
結婚戒子：	PN (8/Aug 取)
花車：	應該朋友借
兄弟姊妹／賓客接送旅遊車：	未諗
花車佈置：	未諗
結婚証書套：	未諗
戒指枕+羽毛筆：	戒指枕PN送
接新娘遊戲道具：	未諗
紅傘及睡衣：	己買紅傘, 欠睡衣
跪墊及敬茶用具：	已買茶具, 欠跪墊
對聯	已買
利是封：	已買
過大禮日子:	2009年11月19日 (星期四)
婚宴酒席
賓客名單：	有初步名單
場地佈置：	酒樓包
March-in片頭：	未諗
婚宴音樂：	諗緊
嘉賓簽名冊	羅浮宮 & 法國
簽名筆	未諗
酒水：	酒樓提供, 會再額外買紅酒
回禮小禮物	唔整
Table Stand：	未諗
婚宴請帖：	酒樓送, 印帖Joy’s card
其他
當日run down：	諗緊
嫁妝	媽媽買左兩對龍鳳鈪同頸鍊
中式禮餅券	未買
西餅券：	美心 100張
過大禮：	未諗
龍鳳被及上頭用品：	已買
婚前檢查：	毅力
回門乳豬：	酒樓送
Honeymoon地點：	暫定北海道

 
好似又係同上次無咩分別, 剩係訂左個花球咁大把~~ um, 不過都開始整rundown 同埋search 吓 D 婚宴音樂架啦~~

同埋諗住返多一次買埋d立雜野, 上次上去好似未買齊~~

拎結婚戒指 - PN

 

等左三個月, 終於可以拎對結婚戒指啦, 今日放左工就出旺角PN拎, JOIN埋VIP同埋送左個戒指枕, 好開心呀, 不過仲要等多三個月先戴得呢~~

羅浮宮CDL - Confirm BD 婚紗晚裝

 

今日再去多次羅浮宮 confirm 晒 big day 當日既婚紗晚裝啦, 其實除左婚紗之外, 都係揀返我上次去揀o個幾件, 因為最近呢兩次expo出既新衫我都唔鐘意, 反而婚紗就揀左8月expo既新款, 席前就揀左件鋼紗款, 無辨法, 直身款真係唔啱心水, 其餘全部揀左直身A-line, 最後埋單加多2000蚊 upgrade LC 款, 無計, 唔係LC既真係揀唔落手, 唯有屈服啦, 其實我而家揀o個幾件都唔係話太鐘意, 但都無辨法啦, 希望big day o個日配合埋化妝set頭, 效果會靚d 啦~~

 

 

網上遞交擬結婚通知書

 

今日要申請網上遞交擬結婚通知書, 一早已經叫定d親朋戚友幫手登記, 我尋晚都非常緊張, 瞓得唔係幾好, 一早七點幾起身梳洗完之後就準備定申請, 我覺得佢個system神神哋咁, 我係不斷入資料, 一時又話我超時, 一時又load 勁耐, 點知忽然又話我已經登記左, 之後就打俾我男友問係咪佢登記左, 佢又話唔係, 問吓係咪d fd 又唔係, 但只有我同我細佬係入到去"步驟3:遞交預約申請" 但按左"確定"係一路都無反應, 係去唔到"步驟4:確認書"個step, 但係去返 "查詢預約" 入返我哋既資料又有record喎, 但係係第10籌囉, 好唔開心呀, 咁早攪, 咁多人幫手都係第10, 好驚揀唔到心水時間呀, 揀唔到咁點算呢, 唉 係咪要搵返律師証婚呢, 而家先搵搵唔搵到呢, 唉. . .

聖安娜 - 輕鬆小熊 / 鬆弛熊碟 Happy Plates

聖安娜 - 輕鬆小熊 / 鬆弛熊碟 Happy Plates

文章日期：08/27/2009 11:09 pm

 

我哋公司每一個月都會有生日會, 我哋每次都要訂三磅蛋糕, 其實上個月已經知道聖安娜有呢個promote 做緊, 但o個3set 鬆弛熊既碟都俾我另一個admin 同事拎晒, 所以今個月我都爭取訂蛋糕, 贈品就歸我, 哈哈~~
本身公司樓下剩係得返啡色o個款, 問左幾間都話剩返啡色, 點知打去我屋企樓下o個間, 佢話啱啱返左貨, 三款都有喎, 仲話剩返唔係好多, 叫我快d去訂, 放工即刻走左去換, 換晒三隻色, yeah

agnes b 花球

 

花球其實我都無諗住咁快攪, 其實一開初我已經好想用agnes b花球, 但諗到佢得一個花球加多個新郎襟花同頭花要成千蚊, 仲要佢今年四月到時加左價, 我都已經放棄架啦, 點知今次行婚紗展時agnes b 竟然有擺booth, 我行左咁多次都係第一次見佢哋擺, 仲要出左d 新款for 今次expo, 佢哋仲要話出去佢哋既shop 都無得揀呢d款, 仲要有八折, 我最終都抵受唔住誘惑join左

我其實心儀以下呢幾款
A.

呢個實物隻粉紅色幾sharp靚過呢張相
B.

呢個成個紫色,我諗緊會唔會深色得滯, 呢個無拎個實物O係手, 太多人圍住


C.

 

 

 

 

 

 

 

 

 

 

 

 

 

 

 

 

 

呢個睇相都幾靚, 個係實物隻玫瑰好似好淺色, 白白哋咁.

 

大家覺得邊個好D呢, 我其實JOIN 左A款先, 因為佢話可以轉一次款, 所以諗緊邊個靚D再轉, 開頭我問D sales d 絲帶可唔可以轉色, 有d sales又話得, 但幫我落單個sales 堅持話唔得囉, 最後我打返落鋪問, d staff又話得喎, 真係玩野.

最後送左呢對anges b 熊仔電話繩

 

 

而家要諗吓四大長老同兄弟姊妹d 襟花同手花, 用絲花好定鮮花呢?

婚前檢查報告

 

今日請左半晝假去毅力睇婚前檢查報告, 大致都正常, 但因為我無乙型肝炎抗體, 醫生建議我打返, 我應該會揀返甲型+乙型肝炎抗體疫苗o係毅力打$1200三支, 不過我諗住問埋我個家庭醫生度睇吓佢哋o個邊打要幾錢先決定.
其實毅力個醫生年紀都幾大吓, 仲要我男友問佢d意見佢都無咩點答, 反而係個護士解答囉, 真係攪笑, 唔洗10分鐘就講完個報告, 早知唔洗特登請假上去聽啦~~

婚紗展 - BOOK 印帖

 

今日又去婚紗展, 真係去左N次, 希望今次係結婚前最後一次, 又係去羅浮宮睇衫啦, 因為九月初會去揀衫, 又係麻麻哋, 仲要JOIN租衫既價錢好似貴左添~~
另外行吓睇印帖既BOOTH, 婚紗展BOOK有八折嘛, 間間價錢都差不多, 最後JOIN 左 JOY'S CARD, 上網睇都好似多人用, 因為我哋酒樓有包帖, 包埋內頁, 所以剩係直接印就得, 我哋200張到$1.8一張~~ 俾左$200訂HOLD 優惠, BOOK埋註冊處時間應該差唔多要印啦, 佢話要個半月先起貨, 乜要咁耐架咩~~
行完婚紗展再行左陣家居展, 再去埋電腦展, 行足成日囉

法國婚紗送相篇

 

法國通知今日夜晚6-9會送婚紗相黎, 所以一放工即刻飛奔返屋企等收相, 七點半到門鐘响啦~~ um. . .點解D相好似無揀時覺得咁靚既, 同埋點解有D唔靚既相都揀左既. . .
仲有呀, 點解本10X12既相簿, 打橫既相佢唔係show full page既? 點解係上下留白既? 個sales GiGi 好似無同我講過係會咁架喎, 攪到d打橫既相好似好細相咁既, 係咪無加錢upgrade相簿就係咁架啦? 點算好呢, 好唔好打去法國問吓呢???
有d後悔揀左影法國, 總之影蒙羅麗莎出海啦, 又多景d, 但我男友唔肯再同我影啦~~

申請大新HELLO KITTY信用咭

 

尋日經過沙田廣場, 見到大新銀行做緊PROMOTE, 諗住黎緊都仲有好多野要買, 所以我同男友各自申請張大新信用咭諗住換機頂盒, 順便申請埋HELLO KITTY 張咭, 就可以拎埋禮品, 佢即場交齊文件一個人就有把HELLO KITTY 遮, 兩個人就有把風扇, 佢哋話可以今日補交, 咁我就今日放左工拎我哋既稅單去啦, 開頭諗住稅單都有地址, 就無再帶住址證明, 點知佢哋話唔得, 要三個月內既住址証明, 稅單個DATE 係08年既,  佢話一係叫我返屋企攞, 一係就後補再等佢哋寄信再通知去禮品換領中心攞, 我又唔想等信先拎, 想今日拎埋, 我當時去到佢哋個COUNTER 係八點, 佢話佢九點關, 之後我又特登返屋企拎返個住址證明, 非常辛苦, 其實為左把風扇, 值唔值呢?

 

我同男友一個揀左垃圾桶一個揀左地毯, 同埋把風扇真係好靚呢~~

 

婚前檢查

 

今日同男友去左毅力做婚前檢查, 成個過程其實好快, 我諗真係十五分鐘就攪掂, 一黎就留小便, 之後就度高磅重兼抽血, 非常快手~~
之後去PN拎戒指, 點知男友覺得隻SIZE太細, 好緊, 又要改返大去, 又要等到29 AUG 先有得攞LU~~

書展 2009

今日去左行書展, 自從我哋決定決婚後,我哋真係慳得一蚊得一蚊, 所以我哋今日特登早d起身去書展, 因為一點前買飛$10一位咋, 一點後要$25一位架, 去度都幾多人架, 我去書展主要都係想買馬仔o個兩本新書, 有八折同埋掛門口既紙牌送, 正!! 另外每年書展我都會去訂cosmopolitan, 其實講真我內容都唔係好睇, 係貪佢哋訂書禮物咋, haha, 我年年都揀香水咁滯, 仲要年年都揀男裝香水, 益吓我男友嘛, 今年揀左duhill london 香水 100ml, 另外加一份神秘禮物, 係一支電動牙刷, 都有用既, 仲有 潤唇膏, 捷毛液, hand cream 同埋好多sample, 真係$240淨係買呢埋野都抵la~~

又買左d 旅遊書, 結婚雜誌同埋多書, 好重呀~~

join 左婚前檢查 - 毅力

 

上個禮拜又去左婚紗展, 呢一年黎, 真係差不多次次婚紗展都有去, 希望去埋下個月既唔洗再去囉, 咁代表我都籌備到七七八八~~
呢個婚紗展我主力都係睇羅浮宮既婚紗show, d 衫都唔太靚, 唉. . .點算呢. 同埋join左 婚前檢查, 間間有婚前檢查既leaflet 都拎黎睇, 其實間間價錢都差不多, 最後join左毅力, 貪佢唔洗好似家計會排咁耐期, 毅力如果揀平日早幾日book就得, 同埋有醫生講解report, 有d 公司如果指定要醫生講解要加錢架. 我哋join左詳細檢查個plan $1,280 再join 埋週年婦科檢查 $380 做埋柏氏抺片檢查, total 1,660, 希望一切正常啦~~  

四大長老見面 & 試妝 by gipsy

今日約齊四大長老見面, 開頭其實都有d緊張架, 始終大家未見過面, 驚會有dead air, 好尷尬架嘛, 好彩今日都好順利, 佢哋都好啱傾, 乜都傾一餐, 氣氛好好, 希望以為大家兩家人都關係咁好就好la~~

今日同四大長老飲完茶之後就去左 mua gipsy度試妝勒~~
搵mua 呢環, 我真係好失敗同好後悔, 說話其實我上年7月已經book左酒席, 仲有年半時間, 應該可以搵到個好好既mua, 但係因為我未來老爺話佢有個fd 個女都係幫新娘化妝既, 咁我就一心諗住搵佢化, 到左今年三月到, 我男友就搵佢, 話想試吓個妝, 佢話自己好忙, 要四月先試得, 好勒, 到四月再搵佢, 佢又話五月, 拖吓一個月, 拖吓一個月, 到終於試妝勒, 佢又好奇怪喎, 淨係幫我打左半塊面底, 話俾我睇吓個分別喎, 但係點講呢, 化完出黎我真係好唔鐘意囉, 佢化到我對眼好濃, 眼線好深, 我其實好唔鐘意, 但佢同我講話新娘妝一定要濃, 唔濃影相唔出, 成班賓客企埋一齊就唔夠sharp, 同埋可能d人黎飲個妝都濃過你, 但我之後不斷睇試妝d相, 真係好唔鐘意囉, 好唔開心, 我男友見我咁, 就叫我出去試吓妝比較吓.
之後我先不斷上網睇資料, 又send email 去問d mua 有無期, 啱心水既都無期啦, 問過triangel la, cici同mona 都無期, 但佢話有個mua joyce 就有期, 但我上網無人有佢個comment, 又未聽過佢個名, 所以都無博, 又問過 sum sum la, sum wong la, jacko lee, may chong, maggie yeung la, 等等, 個個都無期, 都係既人哋個個年幾兩年前就book, 我得返半年, 點會有期吖, 之後問gipsy, 佢覆我話佢只可幫我早+晚, 但就free 另一個mua 跟我全日, 咁我都諗住試吓o唔ok先.
今日就去左試佢, 都攪左好耐, 二點半到到, 七點先走得, 佢都有心機化既, 我都會講返俾佢聽我想點整, 同埋我鍾意清d既妝, 咁我覺得佢化得都ok既, 當然可能會有d化得好過佢既,  但都無期啦, 所以最後我都confirm左佢 la, 希望我bd 佢可以幫我化得靚靚啦~~
ps, 試完晒d妝後, 因為d 眼影都好閃吓, 所以都要落左妝就, 但我同gipsy講我之後要出街, 佢都再幫我化返個淡妝, 當時我都未confirm 佢架, 所以我覺得佢都ok既~~
同埋呢, 講左俾未來老爺奶奶聽我會出去搵mua, 佢哋好唔鐘意囉, 話化妝個個都差唔多架la, 搵返佢個fd個女咪算囉, 但我堅持要出去搵, 我真係好唔想結婚o個日唔靚囉~~

出門酒店 - 沙田凱悅酒店

話說因為娘家屋企地方太細, 結婚當日應該容納唔到咁多兄弟姊妹同親戚, 所以諗住o係酒店出門, 開頭諗住第一選擇係麗豪酒店既, 因為真係好近男家, 五分鐘車程就到, 但上網睇吓資料, 沙田凱悅酒店 (即係大學站一出就到) 今年二月先開, 新淨啲, 價錢同麗豪酒店其實差唔多, 車程離男家大概十五分鐘到, 都可以接受吖, 於是今日就同男友去睇吓d 房
行政套房 (1房)

行政套房 (2房)
其實我覺得1房同2房個廳係差唔多大既, 分別只係多一間房, 同埋1房係山景, 2房係吐露港景, 2房就比1房貴一千蚊, 但我其實唔需要到兩房, 我諗都係得媽咪陪我瞓架啫, 至於個海景, 我唔覺得係必須既, 雖然個sales 成日強調有海景影出黎既相靚d, 但我都諗住慳返一千算la, 同男友傾掂數就confirm la~~

CDL 羅浮宮試衫

 

今日同男友同埋叫左兩個friend陪我去CDL 試big day 當日既婚紗同晚裝, CDL 搬左新鋪, 試衫既地方都幾舒服, 但係D衫就 . . . 我其實唔鐘意鋼紗款, 鐘意直身 A-line, 但佢哋真係無乜囉

婚紗:
其實都試左好多件, 六月expo出既新款都有試過, 但都唔係好啱囉, 佢哋d婚紗款真係好清好清, 想有d detail d既都要加錢upgrade L.C 品牌

晚裝:
都試左好多款, 好多色, 係其中一件紅色啱心水之外, 其他都睇唔上眼, 點算呢
最後我都無決定, 再睇吓黎緊七月expo有咩新衫先, 約左九月再去試過, 唉, 到時真係揀唔啱點算呢???
我d friend 提議真係試唔啱再搵過第二間喎, 唉. . . .

名褂禮服 - 試褂同奶奶衫

 

今日同男友, 未來老爺, 奶奶 同姨仔去試奶奶衫同褂, 先試奶奶衫, 因為未來奶奶都係有小小肥, 所以都唔係太多款揀到, 本身要揀兩條, 但佢最後淨係揀左一條, 話遲d叫佢d朋友黎幫手揀喎.
然後到我揀la, 其實我對褂都無咩要求, 都唔係好識分點為之靚, 都係試左五套到, 就揀左一套傳統既款, 就攪掂去食晚飯lu 

北上筍崗買結婚用品

 

今日返大陸買結婚用品, 搭的士去大約 RMB20, 去之前上網搵晒資料, 帶埋張list 去, 都無去格價, 直接去立興執齊d野, show 張大合照先

買左以下用品:
1. 囍字茶具: RMB65 (個老闆娘開頭話$68, 我話人哋$65喎, 佢話呢套本身要$75, 根住老闆話$65俾我哋啦)
2. 囍字碗具: RMB55
3. 回禮利是封: RMB1.2(12個) X 20 =RMB24
4.長型利是封紅色: RMB10(50個) X 4 = RMB40
5. 兄弟姊妹利是封RMB2 (6個), 金色:RMB2(6個) X 6 = RMB12
6. 包羅萬有利是封: RMB3 X 2 = RMB6
7. 開門利是封: RMB2
8. 囍字貼紙: RMB3/50個 X 5 = RMB15 (佢開4蚊張, 我話人哋都係3蚊, 老闆娘都無我甘好氣)
9. 紅傘: RMB16 (佢話有一隻15蚊但唔係全紅, 我哋呢隻全紅, 賣18, 佢話16俾我哋)
10. 對聯: 絨布面: RMB25/對 X 2 = RMB50, (其實有D平D, 10蚊一對, 但我哋覺得絨布面靚D, 所以都係買呢D)
11. 囍字拖鞋: RMB10/對 X 2 = RMB20
12. 紅色絲花球: RMB15
13. 男女上頭用品: RMB15/SET = RM30 (平D既10蚊都有, 有D 35蚊又有)
14. 酒樓敬茶紙杯: RMB4/50隻 (佢開頭話5蚊, 我話人哋4蚊喎)
15. 啤牌: RMB3 X 6 = RMB18
16. 花瓣: RMB4/包 (120塊) X 3 = RMB12
17. 花車蝴蝶結: RMB3.5包 X 2 = RMB7
18. 囍字拉花: RMB4/2個
19. 鴛鴦囍字: RMB8/個 X 4 = RMB32
20. 絨布囍字: RMB3/個 X 2 = RMB6
21.  細囍字: RMB1.5/個 X8 = RMB12
TOTAL: RMB448 佢收我哋441, 最衰有三份利是封臨尾先俾錢, 唔係屈佢438啦
即係今日用左港幣600蚊到, 唔知平香港幾多呢~~
PS. 今日用左HK$568換RMB500.

倒數六個月

 

剩返半年咋, update 吓個list 先

婚禮日期：	2009年12月13日 (星期日)
註册地點：	未定, 預計婚姻註冊處註冊
婚宴地點：	海港城鴻星
婚妙／婚禮當日攝影
婚紗相：	羅浮宮(酒樓送coupon , 7/Nov 已影 , 26/Feb 取相)
	法國 (8/May 已影12/Aug 取相)
婚禮當日攝錄：	新婚天地
新娘
婚紗／晚裝：	羅浮宮 (1婚紗/3晚裝)
裙褂：	名褂禮服
頭飾及飾物：	羅浮宮提供
花球：	未book
化妝造型：	未搵
婚紗鞋及褂鞋：	有利(婚紗鞋)
新郎
禮服：	羅浮宮 (2套)
恤衫：	已買1件
皮鞋：	已買
兄弟姊妹
伴郎：	未諗
伴娘：	未諗
兄弟：	未諗
姊妹：	未諗
宴會MC：	未諗
女家統籌：	未諗
男家統籌：	未諗
伴娘／姊妹服裝：	金都松柏
媽媽／奶奶服裝：	名褂禮服
爸爸／老爺服裝：	未諗
兄弟服裝：	未諗
兄弟襟花／姊妹手花：	未諗
接新娘／註冊
結婚戒子：	PN (8/Aug取)
花車：	未諗
兄弟姊妹／賓客接送旅遊車：	未諗
花車佈置：	未諗
結婚証書套：	未諗
戒指枕+羽毛筆：	未睇
接新娘遊戲道具：	未諗
紅傘及睡衣：	未睇
Cushion及敬茶用具：	未睇
對聯	未睇
利是封：	未睇
觀禮Invitation Card：	不會整
過大禮日子:	2009年11月19日 (星期四)
婚宴酒席
賓客名單：	有初步名單
場地佈置：	酒樓包
March-in片頭：	未諗
婚宴音樂：	未諗
嘉賓簽名冊	羅浮宮 & 法國
簽名筆	未諗
酒水：	酒樓提供, 會再額外買紅酒
回禮小禮物	唔整
Table Stand：	未諗
婚宴請帖：	酒樓送
其他
當日run down：	未諗
嫁妝	媽媽買左一對龍鳳鈪
中式禮餅券	未買
西餅券：	美心 100張
過大禮：	未諗
龍鳳被及上頭用品：	卡撤天嬌(龍鳳被)
婚前檢查：	未book
回門乳豬：	酒樓送
Honeymoon地點：	暫定北海道

睇返個list 同三個月前都無咩大分別咋喎, 好似無咩攪過咁, 要再加把勁啦!! 仲有半年有時間既~~