乳線炎

唉.....真係好多事幹, 尋日泵完奶時已覺得點解好似泵唔清咁, 仲係好實, 又好痛, 到夜晚時仲燒到成40度, 食住止痛藥都退唔到燒, 我都估係咪乳線炎, 到今朝就去左搵個女醫生睇, 真係乳線炎, 醫生話其實靠泵好難泵得清, 佢話最好其實係靠細佬啜清佢, 根住開左七日抗生素俾我, 佢話呢D餵住人奶都食得, 但一定要食晒成個療程, 唉, 好唔開心, 點解會咁, 今日仲少左好多奶添, 好驚就咁就無得再餵, 所以我都有迫細佬埋身, 但佢食慣奶樽, 其實佢唔係好肯啜, 希望快D好返啦.....

細佬出院了

18 AUG 2013


體重: 3.02KG
黃疸指數: 230




19 AUG 2013


體重: 2,99KG
黃疸指數: 202


黃疸指數跌返D, 體重又有升返D, 威爾斯俾細佬出院了.


我日日都要去醫院, 又要定時定侯泵奶, 座月都座得唔好呀.

細佬入院照燈

終於細佬都係要入院照燈, 今日體重: 2.92KG, 黃疸指數: 255, 指數又升左D, 所以威爾斯都要細佬入院, 除晒衫, 剩係著住條尿片, 遮住隻眼係個箱入面照燈, 見到呢個情況好唔開心, 好想喊, 細佬你要乖乖地, 指數升返就可以出院了,

細佬第一次健康院檢查

細佬第一次去健康院檢查


其實尋日出院, 都覺得細佬好似塊面好黃咁, 但醫院俾出院就照出啦, 今日返健康院一照, 果然細佬真係面黃呀, 佢地度到黃疸指數270, 體重跌到得2.88KG, 收水差不多成10%, 所以健康院要我地去威爾斯CHECK 呀.


去到威爾斯, 抽血CHECK, 黃疸指數係230, 好似話超過250就要入院, 醫院話紮界, 聽日又要再返過去CHECK 呀, 唉, 好唔開心呀, 係咪因為我唔夠人奶, 搞到佢黃呀, 我係咪唔應該堅持全人奶呀.. .. ..

細佬出世第四日 - 我地出院啦~~

政府醫院開刀一般都係住四日三夜, 所以我之前不斷都問醫生同姑娘今日出唔出得院, 同埋BB有無黃, 其實肉眼睇我覺得細佬係有D黃既, 但係醫生姑娘話出得院我就梗係出啦~~


威爾斯D姑娘同嬸嬸其實個個都好好人, 醫生大部份都好後生, 個個都好似啱啱畢業咁.


住左四日院, 開刀埋單只係$350, 同私家生真係差太遠了.


返到去見到哥哥, 我幾日無見佢了, 好掛住佢呀, 之後就過D好忙既日子啦, 不斷餵奶, 換片, 但係唔知點解返到屋企細佬就唔係好止埋身了, 所以我泵出來餵, 同埋佢又啜損左我一邊, 好痛. . .

細佬出世第三天

細佬出世第三天


今日醫生巡時, 話我D血色素仲係偏低, 又問我有無頭暈, 俾佢地咁問一問, 又覺得自己好似有D唔舒服, 跟住醫生就話想我輸兩包血, 同埋黎緊呢一個月都要食鐵丸呀, OMG~~ 點會咁架, 開頭都唔係好想輸, 醫生話輸血有部份有會有D唔舒服, 可能會反膚痕同起"爛" 點知我都中晒, 之後醫生開左D藥俾我食先好D










唉, 又要拖住呢舊野周圍走, 又要傷口痛, 超唔方便, 本身開刀第三日醫院會俾返BB自己湊, 但姑娘見我要輸血, 就幫我照顧BB, 等我可抖下~~

細佬出世後第二天

開刀第二日


醫生巡房, 話之前幫我抽血, 發現我血色素比較低, 問我有無頭暈唔舒服, 我話無喎, 咁醫生話繼續觀察住先啦. 另外今日要試落床了.


之後有嬸嬸黎幫我試落床, 預左會好痛, 不過慢慢都OK的, BB都係定時定候推過黎俾我埋身餵, 夜晚的時候, BB不斷喊, 唔夠食, 但其實都仲未上奶, 所以都要補奶粉.  成個產後房D BB不繼大合奏, 無覺好瞓~~

細佬出世了~~

今朝一早六點幾入院準備開刀生細佬了~~
尋晚食左粒胃藥, 十二點後就唔可以食野了


其實幾點開刀係唔知既, 醫生話要處理晒D緊急開刀後, 有時間先安排我開.


登記入院手術後, 上房休息等安排做手術, 要吊住鹽水, 拖住舊架出出入入, 去廁所, 超唔方便, 老公可陪產的, 但就唔可係病房陪我, 要探病時間先入得黎, 但我都可以出去搵佢, 但拖住舊野太唔方便了, 我都係病房休息多~~


到左下晝, 終於通知我開刀了, 好緊張呀~~


老公全程陪住我, 拖住我, 不過開刀無得即刻影全家幅呢~~


細佬出世3.12KG = 6.8磅, 俾哥哥重左成磅呀~~


醫院一早就問我餵人奶定餵奶粉, 我話餵人奶, 生完後安排左我同BB 係一間產後房, 有姑娘/助產士推BB 俾我埋身餵奶, 原來都過左成個幾兩個鐘先推返我去產後房休息, 老公係走廊話等左我好耐先推出黎~~


開刀唔郁得, 全日瞓左係床度, 姑娘/助產士定時定候就推BB 來埋身~~

威爾斯麻醉評估產科術前檢查

37WK 60.6KG


今日約左下晝見麻醉師, 講解下半身麻醉的風險, 之後簽埋同意書.




之後等見醫生, 醫生幫我檢查睇下我胎盤前置既情況, 醫生話其實已經升返, 正常返了, 之後醫院安排入院紙俾我, 同埋一粒胃藥之前一日食, 下星期細佬就出世了, 好期待啊~~

入院食糖尿餐

36 WK 60.2KG


本身尋日應該要去威爾斯檢查的, 因前日去見左營養師同姑娘, 佢又俾左個新期我, 就同我講尋日既booking 會自動取消, 叫我唔洗去, 點知威爾斯姑娘尋日打黎, 問我做咩唔黎檢查, 根住又話醫生想我入院食糖尿餐, 我問佢咁要住幾耐, 佢又話唔知, 唉, 打亂晒我d計劃. 之後我自己同公司請左三日假, 提早今日開始放我的產假啦.




今朝一早8:00我自己去左威爾斯搞入院手續.
入到去就駁機聽bb 心跳, 又叫我bb 一郁就自己襟掣~~


因為我無食野入院, 咁就可度左我拮手指空肚數字: 4.4




之後就食LUNCH, 個糖尿餐份量一D都唔少, 菜都成兩份, 橙又有兩個, 又派左兩包餅FOR 下午茶食~~







食完野拮手指: 6.1,  都無超標


之後醫生巡房, 我問佢我幾時走得, 佢又話再觀察下先, 根住又安排我去照超聲波, 不過佢自己係度照, 我係望唔到個MON既, 我問佢BB SIZE 正常嗎? 佢話度到有2.31KG, 出世可能同哥哥咁上下, OH, 又係細碼B~~


之後去到下晝四點幾, 醫生又同我講話唔夠床位, 又叫我出院, 完全係玩野, 之後老公放工就過來接我出院了~~

威爾斯見營養師

之前驗到有妊娠糖尿, 約左今日見營養師同姑娘, 派左幾本小冊子, 跟返d 餐單飲食, 盡量小食多餐, 個餐單係suggest 一日食五餐, 有上午茶同下午茶添, 我平時都無食咁野呀~~

準備初生尿片

聽講座同入媽媽會都會有D 尿片COUPON 同SAMPLE 送,

趁D COUPON 到期前買定D尿片

用買一送一COUPON 買左
HUGGIES 0碼 20片 X 6 包 = $66
HUGGIES NB碼 35片 X 6 包 = $114

另外聽講座同入會送既SAMPLE
HUGGIES 0碼 = 28片
HUGGIES NB碼 = 8片
HUGGIES S碼 = 6片

PAMPERS NB碼 = 40片

TOTAL 有412片

唔知呢度夠用幾耐呢~~

參加 Kinetics 講座後嬰兒禮品包

之前聽 Kinetics 講座後, 有張COUPON可以去拎嬰兒禮品包, 佢話價值$600的, 今日出開去食飯, 順便拎埋~~

禮品包包括:

媽媽袋
包被
和尚袍
手套
紗巾
美贊臣 A+ 1號奶粉400G X 2
媽媽奶粉800G一罐 (要自己去藥房拎)

同之前A+講座既禮品差唔多, 仲多兩罐初生奶粉添, 正呀~~

去威爾斯飲糖水 + 妊娠糖尿

 

今個星期有三日都要檢查, 真係好忙, 今胎又零舍多問題, 因為之前照結構照到胎盤低, 就安排左星期一照多次照聲波睇下有無升返, 姑娘話都仲係低, 係胎盤前置一期, 不過我決定開刀都無咩影響, 但就照到我胎水偏多, 於是姑娘就安排我第二日去見醫生, 睇下醫生有咩講.

根住星期二又見醫生, 又等左個幾鐘先有得見, 入到去其實只係講左兩句, 摸下個肚就話OK, 連心跳都無聽呀, 醫生話我胎水多, 驚我會妊娠糖尿, 又安排左我今日去飲糖水.

八點鐘準時去到威爾斯7EF, 今日有8個孕婦要飲糖水, 先抽第一支血, 之後就飲呢碗煻水勒~~

飲完就O係間房到抖兩個鐘, 姑娘唔見議我地周圍走, 始終成八個鐘無食野, 驚我地會暈, 佢有開著部電話, 可睇電視或上下網, 我就瞓左一陣抖下, 大概11點, 就有抽血姑娘黎幫我地抽第二支血, 無問題就自己可拎醫院提供的餅同水食同飲下, 姑娘話大概六點鐘就會有結果, 留意有無電話, 無咩問題就可拎張單去交錢勒~~

費用: 入院費$50 + 公眾急症病房費用$100 = $150,

之後就返左屋企瞓, 到晏晝五點, 見到個無來電顯示既電話打黎, 已心知不妙, 點知真係姑娘打黎呀, 佢話我飲完糖水之後抽O個支血超標呀, 正常係8, 我係8.8呀, 唉, 超唔開心呀, 而家又要約我去見營養師, 又話要食營養餐單, 又要拮手指呀, 勁DOWN 呀, 點解會有無份架, 我無家族遺傳, 我自己無重得多, BB 又唔係大隻, 點解都會中~~

姑娘叫我食少D, 少食多餐, 但我話我個B偏細碼喎, 食少D咪長唔到胎囉~~ 唉. .

威爾斯產檢

34WK - 60.9KG = 133.98LB, (比個幾星期前去健康院檢查輕左D)

原本聽日既產檢, 改左今日做, 約左11:15AM, 等到12:35AM 先有得睇, 但係其實非常之求其, 連BB聽心跳都無, 只係上牀摸下個肚,然後又話我胎水偏多, 驚我妊娠糖尿, 安排我星期四又要飲糖水, OH, 呢個星期真係忙, 根住又約我7月30日檢查多一次, 話我胎水多, 想檢查下睇下BB頭仔會唔會太低, 又係話驚一穿水會沖埋BB臍帶出黎, 又強調一穿水要即刻入醫院, 同埋醫生話尋日我照完超聲波後, 度到胎盤前置屬於一期, 不過都係我決定開刀就無問題, 係驚會流血.

12:50走得, 食埋野返到公司兩點零鐘, 日日咁檢查好攰呀~~

威爾斯照超聲波

34WK

因為之前照結構姑娘話我胎盤低, 就安排我第34週返去睇下個胎盤有無升返. 今日約左11:30AM, 但我等到12:50先有得睇, 咁啱今日老公又係去威爾斯覆診睇眼, 佢咁啱可趕到黎一齊照BB.

姑娘照完後話BB SIZE 正常,而家係 2118G = 4.11LB 但屬於細碼至中碼, OH 又係細碼B, 唉之前又話中碼偏大既, 點算呀

根住又話我胎水"側"界, 偏多, 驚生時穿水既話會連臍帶沖埋出黎, 話一穿水就要即刻去醫院, 又特登安排我早一日見醫生, 等醫生檢查下喎.

至於個胎盤升返左少少, 但都仲算係低, 不過姑娘話我都決定開刀就無咩影響了.

檢查完都1:20, 本身我想下晝都唔返, 不過算LA, 照返公司LA, 食埋飯返到公司2:45到.

Kinetics 母乳餵哺及疫苗小百科健康講座

Kinetics 母乳餵哺及疫苗小百科健康講座 暨第三屆{愛健康}填色設計比賽頒獎典禮.
地點: 觀塘翠屏道3號觀塘基督教家庭服務中心1樓

Kinetics既講座, 出名禮物豐富但難報, 我都報左三次先有得聽呀, D人話佢通常安排三十週以上既媽媽先有得聽, 我都三十三周先有得聽呀, 不過我今日好晏先去到, 成八點先到, 姑娘已講緊疫苗既野, 其實我大仔都有JOIN Kinetics打疫苗, 我都諗緊細仔好唔好去返佢地度打, 但其實我又覺得成日要特登走出佐敦打又好似唔係好方便, 可能會搵返附近既診所打就算了~~

之後另一個姑娘講母乳餵哺同湊B知識, 都講得OK呀, 又無悶場, 唔錯呀

走時拎一大袋禮物~~

仲有張COUPON, 話價值$600, 要去佢地診所拎, 好似話係A+奶粉, 下次出開去檢查先拎~~

懷有二寶 - 第四次健康院檢查

33週 體重: 61.2KG = 134.64LB (肚圍: 41吋, 無咩大到喎)

今日返半晝, 晏晝去健康院檢查, 一點搭九搭十到, 拎29籌, 大概兩點搭十, 十一見姑娘, 都係例牌度下肚, 聽心跳, 姑娘摸肚, 話BB頭仔似未調頭, 不過佢話既然我都開刀就調唔調都無所謂.

同姑娘講我隻腳都仲係好腫, 姑娘就話都無咩辦法, 都係唔好食咁咸同掠高隻腳瞓, 我而家係腫到個腳面俾到鞋掂到都痛, 行路都痛, 真係誇張~~

大概三點三走得, 之後去恆生取消埋個戶口, 排隊連攪手續, 攪左成個鐘, 攰到死, 之後又幫老公買生日禮物俾朋友個女, 又行下GAP, 行下行下行到六點幾, 今日七點幾有個講座仲諗住返屋企擺低D野都返唔切, 自己食埋個麥當當, 就搭BUS 去觀塘, 去到八點一到, 聽到九點半閃, 返到屋企十點三到, 攰到爆~~

第五次私家產檢

31WK (肚圍:41吋 - 好得人驚, 今次個肚好大, 到生都唔知會點)

體重: 60.1KG = 132.2LB (輕過上次一磅)

本身諗住今日淨係請下晝假去檢查, 點知今日出到門口, 勁大雨, 又黃色又紅色暴雨警告, 就決定今日唔返工, 請全日假, 之後食埋早餐先返屋企瞓~~

約左三點二睇醫生, 我地準時到, 三點五到就見完了, 唔洗等就見到醫生, 超快~~

醫生話今日BB心跳142下, 正常, 而家體重係1.7KG = 3磅12安士, 中碼B, 我問醫生到我生時38週, 大概會有幾多磅,醫生 話估計應該有六磅半, 希望真係有啦, 唔想好似大仔咁細粒呀

約下次再私家產檢係8月7日, 之後細佬就會出世了~~

檢查完之後就返奶奶睇個仔, 根住我自己再去沙田聽A+個講座拎禮物, 好攰呀~~

剪頭髮

今日同老公出左上環剪頭髮, 剪短左四吋, 呢個位好似有D尷尬, 驚會好"橋", 但我要紮到嘛, 紮唔到成日拓落黎仲麻煩, 下次再攪個頭應該都要座完月後了.

剪完頭髮後, 去旺角行左陣, 之後又返去沙田行宜家同食野, 非常之攰~~

Baby 涼鞋仔 - NIKE & ADIDAS

 

夏天. . 買左兩對涼鞋仔俾Ng Gor Gor 出街著

 NIKE: $199 八折$159.2

ADIDAS: $199 八折: 159.2

細細對, 好CUTE CUTE 呀~~

第四次私家產檢

29WK
體重: 60.7KG = 133.54LB

今日約左3:00檢查, 我地2:45就到了, 等到3:20有得睇, 第一件事照下BB先啦, 霍醫生度BB頭仔, 肚圍, 度腳仔, 聽心跳一分鐘140下, 一切正常, 醫生話BB肚圍度出黎大概30週, 大左一週, 其他一切正常, 而家大既有3.2磅, 屬於中碼.

至於我胎盤低問題, 醫生話應該升返小小了, 佢話照咁睇到生時應該都唔會太低, 應該唔怕有出血情況. 而家七個月, 要兩個星期檢查一次了.

懷有二寶 - 第三次健康院檢查

28WK 6 DAY
體重: 60.1KG = 132.2LB

今日約左兩點去健康院檢查, 我大概一點十到, 都要拎33號壽呀, 好多人已經座左o係大堂等緊了.

都係一般驗尿, 磅重量血壓就等見姑娘了, 見姑娘佢研究左好耐點解醫生要幫我改預產期到8月24日, 之後就上床姑娘按下個肚, 度肚同聽心跳, 心跳一分鐘15X下, 姑娘話正常喎, 不過姑娘寸我個肚D皮膚好差囉, 唉, 我而家成肚同大脾係紋, 都唔知點算, 之後拎埋到診紙就走得~~

最後大概三點三到走得, 我仲o係門口填BB會, 不過得兩個會, 惠氏同安滿, 拎左兩塊紗巾咋, 本身想拎尿片架嘛~~

之後我自己去左馬鞍山買水泡俾個仔, 老公約左朋友今個星期六帶個仔去游水.

健康創富 美贊臣A+ 產前講座

 

今日放工去左觀塘聽健康創富同美贊臣A+ 舉辦產前講座

主題: 分娩細節全接觸. 嬰兒按摩
日期: 2013年6月5日 下午7時30分至9時正
地點: 九龍觀塘翠屏道3號1樓禮堂, 基督教家庭服務中心
主講嘉賓: 婦產科專科孫鍚鴻醫生, 註冊嬰兒按摩教練廖泳琪小姐

講座禮品: 都算幾豐富, 仲有罐媽媽奶粉要自己去藥房拎~~

 

又買 . . .

今日放工返娘家食飯, 順便行下街, 又買野了~~

呢套麵包超人初生SET, 原價: $299, 七折: $209.3, 一田咭再有95折, 折實: $198.8-

 UNIQLO T-SHIRT 原價$59, 特價$39, 買左兩件俾吳BB~~

Shopping @ GAP

收到風GAP 又做買八件六五折, 放工就去左沙田間GAP 掃貨啦, 今次買褲多, 買左五條, 衫買左三件, 兩對鞋 , 十件都係五百幾~~

 

上左一: 深藍色軍衭: $76.7
上左二: 彩藍色長袖衛衣: $63.7
上右二: 粉藍簡條T: $57.2
上右一: 灰白簡條T: $44.2
下左一: 彩藍色短褲: $51.3
下左二: 彩藍長褲: $50.7
下右二: 深藍長褲: $31.2
下右一: 彩藍短褲: $89.7
灰色鞋: 44.2, 深藍色鞋: 57.2
TOTAL: $566.1
買滿$500, 送左個棒球波仔

而家睇返件件都係彩藍色咁滯既, 哈哈~~

媽媽會: 送美贊臣A+3 及 惠氏3號奶粉

 

Ng Gor Gor 一歲後, 陸續收到媽媽會送來的3號奶粉.

美贊臣 A+3 X 400G

惠氏3號 X 400G

 

買買買. . .護膚品及化妝品

近日各大百貨都做特價, 不嬲用開SOFINA 防曬, 朋友去開SOGO 感謝日, 託朋友買左SET

$432 SET

仲有有朋友O係CHANEL 做, 用員工價買, 超抵~~
1) CHANEL TRAVEL MAKEUP PALETTE ALTITUDE / 15g + MASCARA 1.5g 原價$690, 特價$138
2) CHANEL LIPSTICKS ROUGE COCO SHINE PARFAIT 74 / 3g 唇膏 原價$260, 特價$39
3) CHANEL NAIL VARNISHES LE VERNIS MAY 535 / 13ml 指甲油 原價$190, 特價$29

三樣野TOTAL 先$206, 勁抵呀~~

血併一田購物優惠日

 

一田今日開始做特價, 放工同老公去左買BB用品俾哥哥同細佬

1) Mustela 髮膚沐浴啫喱 750ml + 200ml $218 X 2 = $436
2) Chu Chu 洗奶樽液 x 3 packs = $158
3) 瑞士寶寶 lotion = $151.3
4) ADADO 防蚊 lotion = $103.5
5) NUK 膠奶樽 300ml (Mickey 花紋) = $86.4 x 4 = $345.6
6) NUK 膠奶樽 300ml = $78.4
7) NUK 膠奶樽 150ml = $71.2
8) BABISIL 玻璃奶樽 240ml = $68 x 2 = $136
9 NUK 奶咀2個裝 $33.6 x 2 = $67.2
10) 指甲拑 $21.3
11) AVENT 儲奶杯10個裝 $102
12) MEDELA 儲奶杯3個裝 $118.2
13) VTECH 玩具 $139

TOTAL $1,927.7

咁就洗左差不多二千蚊了, 拎住太多野, 都唔得閒睇自己野同去超級市場了~~

姑姐大阪的手信

 

吳BB既姑姐啱啱去完大阪返黎, 送左一大堆手信俾吳BB同細佬呀,

大合照!

GAP for Ng Gor Gor

GAP for 細佬既

 

BEAMS, QULKSILVER, 西松屋既衫仔

麵包超人

而家D YEN 咁平, 我都想去日本掃貨呀~~

第三次私家產檢

25WK
體重: 57.4KG = 126.28LB

今日約左4:10檢查, 我地4:00到, 等到4:50先有得睇, 霍醫生問去威爾斯照結構報告有無問題, 我答BB無問題, 但就照到我胎盤有D低, 之後醫生就照下, 佢話我係屬於胎盤前置二期, 胎盤貼住宮頸, 要小心有出血問題, 一發現流血就要去醫院, 醫生話估唔到佢幾時會出血, 老公問休息多D, 唔好行咁多有無用, 醫生話其實都唔關事, 都無咩可做到, 都係要觀察住. 至於初期見到既水囊就見唔了, 唔知係咪真係無左, 到開刀時如果醫生見到就會清走佢.

根住就照BB, 醫生度BB頭仔, 肚圍, 度腳仔, 聽心跳, 一切正常, 醫生話BB腳仔都幾長, 而家大既有磅半, 屬於中碼偏大小小.

睇完之後就輪到老公覆診睇對眼, 我就自己行花園街, 買左D衫仔, 褲仔俾吳BB同細佬.

難忘的母親節

今年係做媽媽後第二個母親節, 肚裡面又陀住細佬, 應該好開心, 但係Ng Gor Gor病左, 邊度都無得去慶祝. Ng Gor Gor 咳同流鼻水, 已經睇左兩次醫生, 又食抗生素, 都無咩好轉, 仲不斷咳同好多鼻水, 始終細路仔唔識吐啖, 好難清到D啖, 仲要佢呢兩日都去唔到大便, 係見到佢不斷谷, 但又去唔到, 問醫生又話唔關D藥事, D藥唔會令到便秘, 醫生叫我地俾D鮮奶佢飲, 滑下大腸, 但Ng Gor Gor都係去唔到, 最後Ng PAPA 出動甘油條, Ng Gor Gor先開始去到少少, 但佢每次谷既時侯就喊, 見到佢真係好辛苦, 我真係好心痛, 見到佢喊我都喊呀.

最後疴左兩, 三次後, 佢先谷到一舊非常大同非常硬既便便出黎, 如果佢清唔到出黎, 我地諗住帶佢去仁安睇急症架LA, 但我唔知其實睇急症醫生又可以點幫到佢.

非常難忘的母親節, Ng Gor Gor 要快D好返呀, 健健康康, 期待出年既母親節, 仲有細佬一齊過~~

第一次政府產檢@威爾斯

24WK
體重: 57.2KG = 125.84LB

今日約左10點檢查, 準時到達, 但等到12點2到先有得見醫生, 真係等得好辛苦呀~~

醫生好後生, 講野好快, 語氣又有D倔, 先瞓係床度檢查, 度下個肚, 聽BB心跳, 我問醫生之前檢查話BB心跳有D快, 佢話今次無事, 正常.

醫生見我之前量血壓有成143下, 又要我出去再量過, 好彩正常返, 唔知係咪行去檢查行得太快先咁高.

之後醫生知我第一胎開刀, 就問我呢胎諗住試自己生定開刀, 我答諗住開刀, 佢就話第二胎開刀第三胎都一定要開, 又講左D開刀風險,

醫生睇左我D超聲波相, 話因我唔肯定經期日子, 就幫我改左預產期去24 AUG 2013, 之後就幫我約38週開刀, 12 AUG 2013, 之前一星期 5 AUG 2013見麻醉師, 咁快就約定開刀, 好似覺得好快咁~~

約埋期, 最後12:45先走得~~

Ng Gor Gor 14個月~~

Ng Gor Gor 14個月了, 啱啱學識行路了, 唔洗人扶周圍走, 但係老爺奶奶間屋細, 又多野, 吳BB成日都撞到個頭瘀晒, 心痛死我了~~

牙仔而家先出左三隻咋, 下面兩隻, 上面一隻, 好搞笑~~

都仲未識得講叫"媽媽", 淨係成日O係度"亞BA, 亞BA" 唔知佢係咪叫"爸爸"呢, 都唔知佢識分未, 唔知係咪男仔學講野係慢D架呢~~

因為得奶奶一個湊, 佢又要湊吳BB又要做家務, 所以成日放佢O係BB床度, 開著部電視俾佢睇, 所以吳BB好鐘意睇電視, 尤其係廣告, 又成日俾部IPAD OR 電話開MICKEY MOUSE 俾佢睇, 等佢座定定食粥仔, 其實我自己真係唔係咁想, 但你擺得俾奶奶湊, 佢只有開住電視或IPAD 先令佢可座定定, 所以到我地放假湊返佢返屋企時, 我一定唔會俾佢睇~~ 俾老人家湊, 好難旨意老人家識教小朋友學野, 所以有時都好矛盾, 其實係咪應該自己湊返, 放棄份工呢, 遲D仲要兩個添~~

BB Care 入媽媽會: Pampers, Huggies & World Family

 

今日經過太子, 就順便去左BB Care 入媽媽會拎入會禮物, 可惜最正入會禮物既雅培同雀巢都無晒了, 剩係入左Pampers, Huggies & World Family

Pampers

 

Huggies

 World Family

 

又買. . .adidas 膠鞋

又買左對adidas 膠鞋, 平時放假causal wear 時同落街時可著~~

原價$299, 八折$239.20

melissa 膠鞋

 

呢排成日落雨, 大住個肚成日唔知著咩鞋返工好, 又驚會跣親, 但又唔想買水鞋, 一直想買對靚靚地既膠鞋, 但一係睇唔啱, 睇啱又唔啱size, 因為我隻腳太細了, 有時試最細既都唔啱著. 今日經過新城市melissa, 見到佢有d鞋做緊半價, 呢對好啱我心水呀, sales 話得返一個size, 得返5號, 我著啱啱好呀, 勁開心呀, 即刻帶佢返屋企啦~~

原價: $650, 50% = $325

買買買 @ POLO, NIKE, GAP, H&M, UNIQLO. . .

 

今個月有D鋪頭有減價, 敗左D. . .


POLO RALPH LAUREN OUTLET @ 東涌OUTLET, 買5件照價再七折, 不過比之前都已經貴左D了

左一夾衣, 買俾細佬的, 7折左都要235.2, 呢件貴呀,
中間上黃色長袖恤衫, 買左2歲SIZE, 折左$143.5
下面黃色短袖POLO18M SIZE, 折左$191.1
右面外套2歲SIZE, 折左$182

橫間POLO, 一歲SIZE, 折左$147

呢件係東涌NIKE OUTLET買既, 買黎俾吳BB影家庭照時著既, $359

 

GAP: 風褸半價$149 (18-24M,), 長袖夾衣一套三件半價$124

H&M: 長袖T, 買左2歲SIZE出件著, 特價$49, 短褲, $60/條

呢件買俾細佬的, 扮蟲蟲, 本身想買0-1M SIZE, 但真係好細件呀, 都係買1-2M LA, 一SET三件$99

左面O個件長袖厚夾衣, 特價$19咋, 買俾細佬冬天著架,

底衫$79一SET, LEGGING $39

MICKEY 短袖衫, 特價$50,


又買左二千幾, 我兩個係仔我都咁, 我生女真係唔得掂呀~~

美素佳兒講座

 

 

今日同老公去聽美素佳兒講座

內容主要講: 懷孕媽媽及餵哺母乳營養須知, 餵哺母乳及育嬰技巧

內容都OK 呀, 又唔會悶, REMIND 返有D咩要注意~~

講座禮物有個三角枕, 都好大個下, 可以枕住黎瞓, 唔錯呀~~

 

 

照結構@威爾斯 PWH

今日約左四點去威爾斯照結構, 我同老公三點半就到, 諗住早D等, 點知原來我地係最後一個照囉, 由三點半等到六點先有得照呀, 成個產科D人走晒咁滯呀, 等得勁辛苦呀.

由姑娘照, 姑娘都會一路照一路解釋下而家照緊咩部位. 眼睛, 嘴唇, 尾龍骨, 心藏, 賢, 手指, 腳指等等. 姑娘話BB結構初步睇大致正常, SIZE 屬於中碼偏大喎, 係就好了, 因為佢哥哥O個時出世係細碼B, 39週出世都係得五磅半咋, 希望今次細佬出世中碼我都好滿足了.

另外因為上次去健康院檢查時姑娘話BB心跳有D快, 咁我地又問下姑娘CHECK 唔CHECK 到啦, 佢開左俾我地聽心跳, 今次都有一分鐘167下呀, 姑娘問我有無飲奶茶咖啡喎, 佢話可能都有少少關係, 叫我唔好飲喎,

同埋臨尾姑娘話我個胎盤有D低, 姑娘仲安排左個期俾我, 第三十四週返去照下超聲波睇下個胎盤有無升返喎, 姑娘話暫時無咩可以做, 係睇下佢自己會唔會慢慢升返架咋.

媽媽會: 美贊臣, 惠氏

收到美贊臣的媽媽袋

個人覺得麻麻地, 太細個, 裝唔到太多野~~

另外有惠氏送的換片墊

都OK 呀, 幾大張呀, 唔錯~~

又病. . .

 

唉, 又病了, 有d咳呀, 好煩呀, 上星期先病完, feel 到自己喉嚨痛就睇馮旭焜, 而家睇一次三日藥要370呀, 好貴, 仲要食晒d藥都唔好, 呢兩日又開始起了, 食之前食淨d咳藥, 點知食到個人勁暈, 仲要夜晚發燒添, 唉. . .

今胎成五個月都仲嘔呀, 好辛苦呀. . .

到Kinetics 打預防水痘針

今日同吳bb 到kinetics 打預防水痘針, 姑娘見到我就問我係咪有左第二胎, 夠20週未, 因為姑娘話如果唔夠20週, 吳bb就唔可以打針住, 因為驚會傳染到肚裡面既bb, 好在我啱啱好夠20週, 所以吳bb可以打, 但姑娘話叫我盡量呢兩星期唔好抱吳bb喎, oh. . .

吳bb好似知道到打針咁, 都驚驚地個姑娘, 我地都驚佢今次好似上次健康院打針喊得咁淒涼, 不過今次佢都係打o個陣喊左兩聲就收聲了, 姑娘話因為今次支針好幼, 所以無咁痛喎~~

原來下次九月返健康院唔洗打針, 只係做健康評估, 返黎kinetics 先打六合一針.

影家庭照@ VISION PHOTOGRAPHY

 

之前JOIN 團購買左 VISION PHOTOGRAPHY $268 包18個檔案既PLAN, 今日同吳BB同老公一齊去影家庭照, 去之前都擔心吳BB會驚呀, 因為佢實在太細膽, 太驚陌生人啦, 上到去吳BB見到陌生人又無喊喎, 咁我地以為無野啦~~

間野其實都好細, 無咩景, O係一個白色既佈景到開始影啦, 影左三, 四張, 吳BB就開始喊了, OH, 係咁喊, 點影呀, 之後我地又氹下佢啦, 收聲勒, 一影, 又喊, 救命, 之後都係氹下玩野影下, 吳BB總共影左三套衫, 但都係白色佈景影咋, 因為攝影師話驚一郁佢唔慣又喊喎, 最後影左個半鐘到, 攝影師話影就影左一百廿十幾張, 但可能CUT 左D唔OK既得返五, 六十張, 佢問我地加唔加$680買晒D相, 老公話橫掂一場上到去影, 又唔係貴, 就要晒D相喎, D相要廿五個工作天EMAIL 俾我地揀40張入相簿.

最後埋單
PACKAGE$268
假日附加費$100
所有檔案$680
UPGADE 相簿$50
TOTAL: $1,098


等遲D細佬出左世再一齊影過~~

懷有二寶 - 第二次健康院檢查

19WK
體重: 55KG = 121LB

今日天氣非常潮濕呀, 又落大雨添, 每行一步都要小心弈弈呀, 今日約左兩點去健康院檢查, 老公今日請左假, 陪埋我去, 我地大概一點十到, 都要拎38號壽呀, 好多人已經座左o係大堂等緊了.

都係一般驗尿, 磅重量血壓就等見姑娘了, 大概三點三, 四見姑娘, 講返之前驗血報告一切正常啦, 之後就上床姑娘按下個肚同聽心跳, 仲俾姑娘話我個肚大, 仲問我之前係咪未有之都有個肚腩 , 不過佢話第二胎可能係會大D, 聽心跳時我就覺得奇怪, 點解聽咁耐既, 又望住隻錶計時, 之後姑娘話BB心跳有D快, 要見下醫生, 即刻有D擔心!

等左幾個字, 醫生嗌名, 老公都一齊入埋去見醫生, 醫生就叫我瞓上床聽心跳, 醫生話一分鐘162下, 呢個週數都算正常既, 佢話到真係180下O個D就唔正常了, 佢話應該無咩問題既, 佢話有時大人做完運動心跳都會快D, 可能BB之前郁快左少少, 叫我唔洗擔心, 之後就叫我出去等影印就走得~~

等影印都等左幾個字呀, 最後大概四點三到走得~~

二寶你要乖乖呀, 不過我已經感受到你踢我了, 唔知係咪第二胎真係快D, 大概17週到我已經FEEL 到胎動~~

吳BB終於出牙仔了

呢個吳BB咩都懶過人呀, 連出牙仔都懶呀, 成歲先出牙仔呀, 等左咁耐, 終於下面開始出左兩隻牙仔了, 唔知係咪出牙仔痛呢, 佢而家連星星餅都唔肯食呀~~

學行方面, 都係放開手行到幾步, 佢都係要扶住野先敢行, 又成日拖住人周屋走, 老爺奶奶屋企地方又細, 成日周圍撞, 成日撞到個頭同塊面瘀晒, 心痛死我~~

懷有二寶 - 第二次私家產檢

16WK
體重: 53.9KG = 118.58LB

今日約左霍醫生做產檢, 今日已經16週了, 應該都可以照到二寶既性別了~~

一照就見到二寶周圍郁, 又揮手, 醫生先度左二寶既頭圍, 肚圍, 手同腳正唔正常先, 醫生話正常照返係16週SIZE, 聽心跳: 每分鐘150下, 正常, 胎水足夠, 但個胎盤有少少低, 而之前照到既水囊仲O係度, 但細左少少, 有2.9CM, 都要再觀察住~~

之後就係照我最關心性別啦, 醫生都拍左我幾下, 照到個大脾位, 由低照上去, 好明顯見到"菇菇"了, 吳BB有個細佬了~~

講真係會有少少失望, 我好想湊個"好"字, 但呢個係天安排俾我既, 我都會好好愛錫佢, 二寶一切正常, 健健康康就足夠了~~

另外,等見醫生時填左D媽媽會表格, 之後俾錢時我交俾姑娘, 姑娘俾返美贊臣既包被同紗巾我~~

之後返到屋企開信箱時, 收到雪印寄黎既沙灘波, 仲有思敏傑3號 300G 換領COUPON 添, 雪印之前都無收到2號SAMPLE, 收到3號都好吖~~

一歲到健康院檢查及打針

 

今日約左2:00PM, 到健康院打針同做健康評估

體重: 8.66KG = 19.05LB

吳BB體重由上次六個月評估, 10線升到上25線, 雖然O係別人眼中都仲係細粒BB, 但我地已經好開心了, 由出世既3線, 慢慢升到10線, 到而家25線, 不斷進步已經好好架啦~~

做評估時, 由於吳BB扭眼瞓, 初時其實都唔係好合作, 有D扭計, 之後慢慢開始好D, 姑娘拎D積木俾佢, 佢都自己識得拎黎玩, 同埋俾D星星餅睇下佢自己識唔識得拎, 佢拎係識都拎既, 但到而家都未識得自己放入口, 其實我哋都不斷TRAIN 佢自己放入口, 但佢都始終唔識自己放, 姑娘都係叫我哋要俾佢自己放, 唔可就佢咁多.

另外, 吳BB 到而家足一歲都仲未出牙仔, 姑娘話到歲半唔出都唔怕喎, 佢話若果真係歲半都唔出先帶佢去牙醫到CHECK 下喎~~
同埋我地又問姑娘點解佢好似都唔係好肯講野, 姑娘話一歲正常係未識講好多野, 識講D BB話已經係正常.

姑娘問我哋BB識行未, 我哋話放手識行幾步, 佢話咁都OK了.

食方面, 吳BB而家一日飲三餐奶, 每次七安, 粥仔就每日兩餐, 每次一碗, 姑娘話OK喎, 但就叫我地要開如俾學習杯佢自己拎住飲奶, 唔好用奶樽了~~

總結黎講, 姑娘話吳BB 正常一歲BB 發展~~

之後就等打針, 好快就叫名了, 姑娘話一歲BB已經好大力了, 所以一個姑娘按住佢雙腳, 然後老公捉住佢雙手, 一隻大脾打一針, 姑娘一落手, 吳BB就喊到拆天了, 真係心痛死我呀, 打完針都喊左一陣先收聲呀, 然後座一陣, 我抱佢瞓左一陣, 老公就去拎退燒藥, 其實三點到都打完針了, 不過等拎藥都成三點十先走得啊~~

美國雅培講座

 

 

今日去左佐敦逸東聽左美國雅培舉辦既媽媽學堂之免費產前講座

講座內容:

1) 初生嬰兒護理知多少
2) 精靈BB全面睇
3) 互動湊B實習區

其實內容都同之前聽既差不多, 不過諗住REMIND返D記憶, 加上D禮物真係好豐富, 所以我都參加左~~

 

D禮物真係好實用, 仲有D尿片買一送一COUPON, 真係好正 ~~

吳BB一歲啦~~

 

吳BB一歲啦!

時間真係過得好快, 上年出世到今日一年了, 睇返吳BB出年到今日既相, 樣貌都變左好多啦~~ 由一舊唔識點郁既飯仔, 而家已經扶住野周圍走了~~

我地今日都只係一家人同吳BB食飯, 之後食蛋糕, 簡簡單單咁渡過了, 等佢大D先約D朋友仔同佢一齊開生日會啦~~ 

出年既生日會, 都會有細佬陪佢一齊過呢! 希望你兩兄弟一齊生活一齊成長, 有個開心愉快既童年

 

我既寶貝, 祝你生日快樂~~

懷有二寶 - 第一次產檢 - 霍詠儀醫生

 

我同老公幫bb 改左個花名, 叫 "二寶" 呵呵~~

知邊有左二寶後等左兩個幾星期, 終於做第一次產檢, 可以見到二寶了, 未照之前其實一路都有d擔心~~ 一見到霍醫生就傾左兩句, 就照bb先la, 好心急呀, 醫生碌下碌下, 就見到個胎囊了, 之後醫生話見到心跳了, 我都見到閃閃呀, 然後醫生放大心跳聲, " book book book book" 醫心話一份鐘150下, 正常喎, 好開心呀, 個心定返d~~ 不過醫生另外照到個水囊有4CM大, 佢話唔知係我本身有定排卵時有既, 佢話如果排卵時有可能大概三個月到自己會爆, 或者唔爆就如果我開刀生先整走佢.  我哋問醫生相隔八個月就有左有無問題, 佢話如果唔試自己生, 應該問題不大既~~

二寶你要乖乖成長呀, 爸爸媽媽下一次見你要一個月後了, 你要乖乖呀, 媽媽都會努力的~~

今日我的重量: 53.66kg = 118lb
BB SIZE: 8W2D
CRL: 1.64CM
診金 + 藥費 = $650