租衫

尋日先講緊未租衫, 今日就租左啦~~
今日同吳生去左行婚紗展, 周圍睇吓租衫既counter, 有平有貴, 但就咁睇都唔識分邊d靚邊d唔靚, 最後 join 左羅浮宮租衫 $5288 有五件衫個plan, 因為有酒樓coupon 關係減$800, 即係$4488有5件衫, 睇過d 相簿, 有d 都ok 啦, 我諗咁大間鋪唔會揀唔到衫呱,  要到婚禮前三個月先去試衫, 即係仲有9個月呢~~ 好漫長呀!!!
其實我覺得自己都好求其, 都無睇多幾間就決定join, 我都有d驚自己會後悔呢~~

仲有一年

一年後既今日我哋就結婚啦~~
但係我哋其實好多野都未攪, 暫時只係book左酒席, 買左餅咭同埋影左一輯婚紗相咋, 化妝未搵, 衫又未租, 婚禮攝影又未搵, 租車呀, 鮮花o個d 更加未攪啦, 不過仲有一年, 我諗仲有時間呱, 不過身邊d 朋友都係出年年尾結既, 好多都攪掂晒啦, 咁我都要快d手至得, 同埋出年經濟唔好, 唔知d 野有無得平d呢???

羅浮宮揀相

今日去左羅浮宮揀相, 好得人驚, 由2:30 攪到7:30先走得囉. 
本身自己package 包左32 張相, 最後揀多15張, 其中5張係effect 相.開頭第一輪揀剩八十幾張, 咁梗係再睇多次睇吓邊D 差唔多場景同甫士既就CUT 梗D LA, 最後揀得好辛苦, CUT 到五十幾張, 唔理, 要再CUT, 最後揀左47張埋單.
可能真係第一次著婚紗影相, 張張都覺得唔錯, 反而晚裝揀得好少, 每套都係揀左3 - 4張到, 同埋我自己既單人相都揀左9-10張, 其實我覺得單人相唔要咁多都得, 但係吳生係咁話唔好cut, 如果唔係可能剩係加effect 相就算, CDL 真係會將你影得最靚o個d 做左effect, 又唔俾你當普通相咁揀, 剩係呢5張入埋相簿都$1,400, 加埋另外o個10張$1,280, 剩係加相都$2,680.
揀相之前明明一早同吳生傾好話唔做coating, 但係因為CDL offer 個價做埋coating, d 散相入埋相簿同埋upgrade埋d 油畫架真係抵過就咁買file 散相囉,  最後都左失手, 失晒預算添, 唉. . . .

CDL 羅浮宮影婚紗相

今日去左羅浮宮影我哋第一輯既婚紗相~~
好犀利, 我哋10點鐘去到, 夜晚8點先走得, 中途只係食左個飽咋, 真係辛苦過返工, 但整體黎講今日都開心既~~
我今日既化妝師係亞LING, 佢好細心架, 淨係化我對眼都化左好耐, 所以化到我對眼好精靈呢~~  另外D 髮型都係佢幫我諗架咋, 個個造型都好靚, 我都好鐘意, 不過影完先發覺我今日無用到頭紗囉, 但係我既造型都好特別既, 希望效果會靚啦!! 我淨係化妝SET 頭都攪左兩個鐘, 不過化得靚都值得既.
今日既攝影師係大SAM, 助手係亞清同TERRY, 大SAM 好好, 好有心機, 又好識攪氣氛, 助手亞清同TERRY都好幫得手, 大家都响好輕鬆既情況吓完成拍攝~~
我今日總共有4套衫, 2套婚紗同2套晚裝
第一輪著青色晚裝影影室內景, 係最新一輯徐淑敏著過架, 亞LING幫我响個頭到加左個皇冠, 都好靚吖~~
第二輪著魚尾開叉影婚紗, 影花園外景, 今日都好熱吓, 所以都覺得影得好辛苦, 仲要室外有蚊囉~~
第三輪著紫色晚裝, 影左後花園既電單車景等, 但係我俾蚊針到塊面囉, 激死人, 之後再入返室內影木馬景等~~
最後一輪, 著白色拖尾婚紗景大堂景, 今次呢個造型好特別架, 唔識點形容, 我驚會有D浮誇, 但亞LING話覺得我呢個造型好清純喎, 希望影出黎效果好啦~~
今日男仕化妝要收$100, 又UPGRADE 左件背心+$180, 不過算啦, 無理由得我自己靚晒架嘛~~
約左下個星期揀相啦, 希望揀到相啦, 因為我哋都驚自己笑得唔好睇呀~~

絲花花球

今日約左網上幫人做絲花花球既irene 拎花球, irene 好快手呀, 因為我趕住今個星期五影婚紗相, 所以佢用左十日到就幫我搞掂左個花球啦!
呢個係佢網上既花球

呢個係我收到既花球

 

都好靚吖~~