第三次健康院檢查

 

29WK3DAYS - 53.7KG

見下次私家產檢要一月中先, 又放緊假, 就晏晝去左健康院檢查, 2點去到, 都預左要等, 3點七, 八到先有得睇, 又係睇五分鐘O個隻, 聽寶寶心跳, 姑娘摸頭仔, 姑娘話好似已經調了頭, 我話乜原來咁早就調頭架啦, 不過佢話未肯定, 下次檢查可以再摸吓確定~~

之後去左行新城市等老公放工~~

BOOK 左開刀日子

 

知道有B型鏈球菌後, 都係決定開刀了, 費事順產會感染俾寶寶, 之後分別叫奶奶問佢既親戚同叫亞媽問亞嫲, 佢哋都俾左3月8日我, 話朝早九點至十二點好時辰, 我今日打去霍醫生度約, 佢CONFIRM 左3月8日, 但係姑娘約8:30AM, 我問佢9:00AM 得唔得, 佢話如果我哋想9:00AM 就當擇時辰, 就醫生同醫院都要加錢, 真係搵笨, 我話咁算啦, 希望佢約8:30, 攪到9:00 寶寶先出世啦~~

第三次私家產前檢查 - 仁安霍詠儀醫生

 

25WKS ~ 52.1kg

今次約左星期六去見醫生, 非常之多人, 都等左成個鐘先見到醫生, 又可以見寶寶, 聽心跳一分鐘一百五十幾下, 我問霍醫生上次照結構姑娘話寶寶係細碼, 霍醫生今次幫我照佢話寶寶SIZE中碼, 一切正常, 不過醫生建議我去飲糖水, 睇吓有無妊娠糖尿喎, 因為平時就咁CHECK 尿未必CHECK 到喎, 同埋醫生話可以諗吓點生, 如果要開刀就打俾佢姑娘約, 三月一至十四日其中一日喎, 仲心大心細中~~

Johnson Baby, NUK, 嘘嘘樂 及 迪士尼美語世界媽媽會~~

 

之前上網申請左一堆媽媽會, 陸陸續續收到禮物了~~

 

仁安免費產前講座 + 一田大減價

 

放工去左沙田大會堂聽仁安免費產前講座, 聽完後9:00pm 就去一田睇吓, 仲諗住咁晏成九點先去會無咁迫啦, 點知bb 部都一樣咁多人, 我哋之前都係諗住主要買bb床同bb床上用品, 最後買左一張california bear bb 床, 連獨立彈黃牀褥, $1,380 + $50送貨, 我覺得其實好似都唔係好平, 根住買左兩set bb床上用品$429 x 2, bb要擺去奶奶度湊, 咩都要買兩份, 真係好甘~~

買多一個avent 細奶樽 $110 - 8折, 一件amor bb 厚衫仔$149, 埋單$2,525.-

p.s 前幾日去威爾斯抽左d分泌去驗, 今日又姑娘打黎叫我9 Dec 要去見醫生, 肯定驗到有問題啦~~

第一次政府產前檢查 - 威爾斯

23weeks

第一次政府產檢成23week 差唔多24week 先第一次睇, 約左10:00am, 不過我都遲左少少到, 加上新症好多人排隊, 佢mark 我10:18先到, 之後去觀察室度高磅重, 159cm, 49.6kg (109.12磅), 心跳又有111下.

10:45am 姑娘叫名對返d資料同問病歷, 佢問我有無b型鏈球菌同陰道炎, 我話我無驗過b型鏈球菌, 問佢有無得驗, 佢話可能遲d去健康院驗,  根住我話有bb前都試過有陰道炎, 同埋而家d分泌有時都會青青黃黃, 根住姑娘話佢mark 低先, 睇吓陣間醫生會唔會幫我check.

之後等到11:20到, 就叫我入4號房見醫生, 姑娘一黎就叫我除晒底面褲瞓上床, 之後一個好後生既女醫生先聽寶寶心跳, 根住幫我抽d分泌去種菌喎, 過程都有d痛, 醫生話今日可能會留少少血, 佢話如果真係有菌會call 我返去拎藥.

著返褲後, 見返醫生, 我同醫生講話我幾次做檢查無論政府定私家都話我心跳100下以上, 根住醫生就叫我去做心電圖, 做完再返去搵佢, 照完後醫生話正常喎, 之後我就走得. 走時大概11:45, 根住就趕住12:30出到旺角新世紀拎johnson baby入會禮物, o係威爾斯門口有d亞姐叫入bb會, 我都填左, 拎左一條口水肩同祙仔~~

好在啱啱好12:30出到旺角拎埋份入會禮物, 食埋野就返公司了~~

剪頭髮

 

對上一次留短髮, 已經係中五了, 十幾年都留住長髮, 今日為左寶寶, 去左剪頭髮, 短到膊頭以上呢, 好唔捨得我d頭髮呀~~

雅培講座

 

今日去左旺角帝京酒店聽雅培講座, 今次內容係
1) 如何培養精靈baby
2) 初生嬰兒護理知多少
呢part 個醫生講得幾好, d內容都有用,
互動湊b實習區
個場唔係太大, 人又太多, 都好迫吓, 睇左一陣就走左lu~~

不過今次講座既禮物非常豐富, 滿載而歸, 好開心呀~~

 

 

威爾斯照結構

21weeks2days

今日去左威爾斯照結構, 約左11點, 準時到, 但等到12點半先叫我名入12號房, 係個姑娘照, 姑娘都有一邊照一邊講照緊咩位既, 頭仔, 手仔, 心, 腎...等等, 照左半個鐘, 姑娘話就咁睇就大致一切正常, 同埋確定寶寶係仔呀, 老公問姑娘寶寶size 正常嗎, 姑娘話正常, size 係細至中碼b, 聽到係細碼b有d唔開心添~~ 姑娘話我本身都唔係大隻, 點會係大碼b呢, 要食多d至得, 臨走問姑娘可唔可以開一日到診紙, 姑娘唔肯囉, 走時都1點06分, 我食埋野返到公司都二點幾差不多三點了.

bb care 產前產後60天講座

 

今日放工同老公出觀塘聽bb care 攪既 "產前產後60天"講座, 同以往講座唔同, 入場前就排隊拎禮物, 好開心~~

內容又唔可以話無用, 但其實我又會覺得好似好hard sell d product 咁, um. . d 油呀, d 疫苗計劃, 連僱傭驗身計劃都sell~~ 好似同佢個topic "產前產後60天"無咩關係喎~~

 

 

bb care x cordlife 講座

 

今日同老公聽左個bb care x cordlife 講座, 第一part 非常hard sell, 講儲臍帶血庫有幾好, 內容非常之悶, 第二part 講生產過程同點減痛, 呢part 好d既, 之後有一part 有陪月講點執走佬袋, 太多人啦, 迫唔到去聽, 拎埋禮物就閃人lu, 佢所謂價值一千既禮品, 非常搵笨~~

 

 

買 High Chair 同包被

 

永安百貨特價, 知道 Aprica high chair 7折, 放工就同老公去睇吓, 順便睇吓有咩抵買, 行左一個圈都無咩啱, 最後剩係買左一張high chair 同厚薄包被各一張咋, 我同老公都覺得其實未洗咁早買野住既, 不過見張high chair 7折真係抵, 買左先囉, 其他日用品遲d其他百貨公司特價再睇吓有咩買

 

第二次健康院檢查

 

17wk 2 days

今日下晝請左半日假第二次去健康院檢查, 上網知道去健康院係無得睇寶寶, 只係聽寶寶心跳, 所以都唔洗老公陪我了, 兩點一到去到, 非常多人, 拎第83籌, 原來上個星期四八號風球d人改左今日檢查, 所以非常多人囉, 位都無位座咁滯~~

等左成兩個鐘, 先有得見姑娘, 講返上次既驗血報告, 話一切正常無問題喎, 根住聽埋寶寶心跳就走得, 成個過程五分鐘攪掂, 真係好無聊~~

夜晚座o係梳化睇電視, 忽然好似feel 到寶寶郁呀, 彈吓彈吓咁, 叫老公摸吓, 佢都feel 到呀, 寶寶, 你係咪郁啦?

第二次私家產前檢查 - 仁安霍詠儀醫生

 

今日第二次私家產檢, 今次book 左去尖沙咀睇, 唔去仁安睇, 因為d人話尖沙咀平d, 所以試吓, 三個星期無見過寶寶, 加上早一兩個星期又係咁病, 又感冒又腸胃炎, 所以都有d擔心, 好在醫生話寶寶都啱size, 中碼b, 一切正常, 又聽寶寶心跳, 一分鐘150下, 老公問醫生睇唔睇到係仔定女, 開頭醫生話寶寶個pose 跪左o係度, 之係佢係咁拍我個肚, 寶寶o係度彈吓彈吓, 根住醫生就話睇到佢大脾中間有d野, 應該係仔, 佢話8成係仔~~
o係尖沙咀睇真係平過仁安好多呀, 上次就咁睇, 無藥都$840, 今次醫生開埋維他命同鈣片, 開左60日, total 都係$510咋, 上次真係俾人搵笨呀, 下次都係去返尖沙咀睇, 約左12月頭

第二次政府產檢 - 威爾斯

26WKS - 51KG

今日返威爾斯第二次檢查, 約左10:30AM,  等到成12:15AM 先有得睇, 辛苦到暈, 仲要一入到去, 問我係咪佢哋叫我返黎, 唔係唔通我自己中黎咩, 有一個男實習生跟住, 先聽寶寶心跳, 醫生話一分鐘一百五十幾吓, 正常喎, 根住講返上次抽左分泌去驗, 原來我有 B型鏈球菌呀, 唉, 好唔開心呀, 醫生話開七日抗生素俾我食, 一定要食晒去, 唔係會有抗藥性, 同埋到我生O個時, 穿水時要打針, 以防感染到俾寶寶, 同埋醫生話下次去返健康院檢查就得, 之後就去左攞藥, O個時係12:30到,  要等成二百八十幾個, 我咪去買外賣返屋企食, 食完一點九到行返O個去, 去到差不多兩點, 都仲要等多60個囉, 真係好變態, 最後成兩點半先走得, 都係O個句, 辛苦到暈呀~~

同老公講中左B鏈後, 老公話咁都係開刀算啦~~

Oscar Test

今日同老公去左威爾斯做 oscar test, 約左11點, 我哋10:45 到, 先度高磅重, 根住姑娘問病歷, 之後就叫我哋去13, 14號房等嗌名, 都等左個幾鐘先到我哋, 個醫生開頭都無出聲, 佢自己係咁o係度照, 間唔中講下bb 個頭仔o係呢度, 腳仔咁, 見到bb o係到彈吓彈吓, 好攪笑, 又見到佢隻手好似放左o係咀度咁, 醫生話今日係12wks 3 days 今次醫生度左bb size, 頭至屁股6.55cm, 我第一次7wks 時見佢先得1cm, 得一個圓點, 今次大個左好多, 有頭仔, 手仔啦, 雖然知道醫生唔會肯講, 不過我哋都借d易問吓醫生見唔見到係仔定女, 開頭佢話太初期啦, 未見到, 之後佢同我哋講返個數據大概係1.x, 正常, 不過要等埋驗血結果先肯定係無事, 我又問埋醫生可唔可以幫我哋約埋結構, 個姑娘話幫我哋約左la, 好開心, 開頭仲擔心要自己出去搵私家照, 可以慳返二千幾la, 之後醫生忽然彈左句出黎: 你哋第一胎呀? 我哋答: 係呀, 醫生: 似係仔, 我同老公超開心, 其實個醫生真係好好人, 佢開頭開左半日假紙俾我, 我咪問佢可唔可以開一日囉, 根住佢見o個時都十二點八, 九, 佢就開張全日假紙俾我,  真係對威爾斯d醫生姑娘改觀呀, 佢哋好好人呀~~

第一次健康院檢查

 

11 wk
今日老公同我請左半日假去健康院檢查, 約左8:30, 大概搭八到上到去, 要排到40號籌了, 非常之多人, 攪到差唔多十二點九先走得, 大部份時間都係等.
1. 驗尿, 度高, 磅重, 量血壓
2. 聽講座
3. 見姑娘 - 講吓d病歷
4. 見醫生 - 醫生用手伸落下邊同摸肚check 子宮size, 好驚~~ 不過之後聽到BB 心跳, 即刻開心返
5. 抽5支血 - 比其他人抽多支血, 因為醫生話我心跳快, 每分鐘100下, 所以抽多支睇吓會唔會係甲狀線有問題. 我上次私家產檢又係俾人話心跳快, 度到每分鐘100下, 唔知點解.
走O個時一大班人圍住叫填Form 入BB 會, 雖然有D 之前都入左, 都照填, 攞返D禮物走~~
好期待下星期去威爾斯照OSCAR, 可以見到BB 啦~~

仁安落訂

 

我哋上個月尾第一次產檢既時侯, 已經話出年2月預產期既床位已經full 晒, 已經覺得好誇張. 又驚自己唔早d book 會無床位.  所以未夠8週就要落訂, 真係好誇張.
其實之前都好掙扎夠竟政府生定私家生, 價錢真係差天共地, 政府幾百蚊埋單, 私家我諗出年無六萬都落唔到樓, 但係我真係好驚要我自己順產, 我覺得自己一定生唔到, 掙扎左好耐, 都係要屈服, 落左一萬蚊訂至算.

第一次私家產前檢查 - 仁安霍詠儀醫生

 

7w2d
一知道bingo 就上網search 有邊個醫生可以o係接仁安生既, 就search 到有d人話霍詠儀醫生幾好, 就打去book 第一次產檢, 7月11日book, 都要book 到今日7月29日, 等左三個星期, 終於可以睇吓bb, 知道有左後, 都無睇過, 個心都好唔實在, 約左4:00pm, 4:00pm 去到, 都要等一個鐘, 成五點先睇得, 仲要我諗5-10分鐘就出返黎, 非常簡單,
姑娘幫我度高磅重量血壓, 佢話血壓都無咩問題, 但心跳快左d , 有105吓, 度左兩隻手都係呢個數字, 佢仲問我係咪好趕過黎, 我話唔係, 不過我問返醫生我心跳係咪好快, 醫生話都唔算, 大肚婆係快少少, 如果去到120下先算唔正常
首先問醫生我懷孕初期生蛇對bb 有無影響, 醫生話生蛇唔會影響到bb, 生水豆就會, 不過我已經生過就唔會再生.
最期待照超聲波, 我特登飲多d水, 驚用肚照唔到要陰超, 點知醫生話下次唔洗特登急尿, 已經夠大可以照到架啦,
醫生一照就照到個胎囊, 側邊白色既部份就係bb 黎, 然後醫生就開左個speaker, 話bb 已經有心跳了, 一分鐘150下, 聽到好快"book book book book" 好快就照完, 我都唔記得問佢而家bb size 有幾大, 著床位置好唔好, 同埋d人好似話可以見到bb 閃閃既心跳, 我都唔記得問醫生睇唔睇到
同埋check 到我而家係7w2d , 同排卵期時間夾返~~
而家預產期改左去2011年3月13日, 咁check 唐氏綜合証既檢查要改期了.
下次約左9月23日 3:30pm 做檢查,
姑娘問我會唔會o係仁安生, 如果會就要兩個星期內俾一萬蚊訂, 預產期二月既已經full 晒, 我預產期三月都要快d決定, 我都掙扎緊, 出年又加價, 好貴,

P.S. 今日返左奶奶到食飯, 老公係咁迫我食魚, 我已經好唔想食, 都夾硬食, 點知食到最後, 忍唔住嘔左出黎, 都係我有左之後第一次嘔~~

仁安免費產前講座

 

之前上網search 吓search 吓, 搵到一個仁安免費產前講座, 仲要o係沙田攪, 就join 左, 今日去聽, 分兩part, 一part 講順產同開刀既分別, 聽完都係十五十六, 之後o個part 就係講產前產後營養知識, 聽完都了解多左, 都有d用既, 聽完仲有禮物收添~~係Mustela 試用裝, 又幾好喎~~

 

作嘔作悶

 

好似開始有少少作嘔作悶咁, 尤其食晏晝, 一聞到D豬肉味都唔想食了, 唔係好食得落野, 又好多胃氣, 放工返屋企搭巴士, 兜多兩兜又有少少想嘔咁~~
我D蛇, 應該都七七八八了, 舊O個面流緊血結疤, 新O個面都消緊啦~~

生蛇

 

4W7D
我竟然O係懷孕咁初期期間生蛇, 我真係好唔開心, 我尋日夜晚發覺點解我左胸下面好似痕痕哋, 初時都無為意, 以為俾蚊咬, 點知沖涼既時侯發現我左背都生左好多粒粒, 我就好驚啦, 俾我老公睇吓, 因為佢之前都生過蛇, 佢一睇就話應該係生蛇, 我真係好驚, 驚唔知會唔會影響BB, 今日就去左睇醫生, 醫生都話難攪, 而家懷孕咁早期, 又唔敢開藥俾我食, 因為唔肯定D藥會唔會影響BB發育, 所以我同老公同醫生商量後, 決定唔食藥, 剩係搽藥膏就算, 仲有開左D安全既止痛藥俾我食, 如無必要我都唔會食~~
不過醫生話生蛇應該唔會影響BB, 希望係真架啦, 我真係好驚~
仲要本身約左聽日做第一次產檢, 我打去醫生度同佢講我生蛇, 問佢我可唔可以去睇, 佢話驚我會傳染俾其他孕婦, 要我好返先再BOOK過去睇, 點解我可以咁黑仔~~
睇醫生: $400- 開左三日假俾我

BINGO

11 JUL 2011 (MON)

4W5D
體重: 102磅
上個星期三 (6 JUL) 深粗後第十三日, 驗到紅D深粗綠D淺線後, 每日早晚我都KEEP 住CHECK, 尋日用埋CLEARBLUE DIGITAL 既棒棒CHECK , SHOW 2-3WK, 呢兩日綠D都差不多100%深了, 今日就請左病假去樓下驗孕, 個RESULT 其實無我CHECK 紅綠D咁明顯, 不過都好肯定係見到兩條線, 醫生話係有架啦, 咁我同老公就問埋醫生, 點解我仲會有M痛 FEEL, 醫生話有D人係咁, 因為子宮膨脹緊, 但有時真係好痛吓, 真係好驚吓, 醫生話如果真係擔心, 可以搵個婦科醫生檢查吓, CONFIRM 唔係宮外孕, 根住醫生就寫左張懷孕証明俾我去醫院排期, 醫生係以我最後PERIOD 日子: 28 MAY 2011計我預產期: 4 MAR 2012, 我都幾肯定呢個日期唔準, 因為我遲排卵, 我而家一定無6WK, 不過醫生話佢哋唔理, 全部都係計LMD, 最多係之後照超聲波計返啱既日子.
之後睇完醫生我哋去左食早餐, 食到11點零鐘, 就去威爾斯登記, 11:30到, 12:30先走得, 等左成個鐘, 俾左兩個期我
1) 唐氏綜合証檢查: 24 AUG 2011 (幾肯定遲D要改期, 因為佢一定要12WK既時侯做, 如果預產期有7日誤差就要改期)
2) 威爾斯產檢: 12 NOV 2011 (好誇張, 成五個月, 20WK 先排到第一次睇, 所以佢要我哋自己約去健康院做第一次產檢)
健康院: 25 AUG 2011
私家產檢, 我係上網睇人哋D COMMENT 話仁安霍詠儀醫生幾好, 又O係仁安掛單, 不過我都未諗清楚BOOK 唔BOOK, 但D人話超FULL, 唔早BOOK 就無位, 都唔知點算, 而家約左最快都要7月尾先有得睇, 到時應該有7WK, 會多野睇D, 但要等成三個星期, 真係好漫長
私家產檢: 29 JUL 2011
老公家姐介紹左個女醫生, BOOK 左星期五(15 JUL)就有得睇, 不過我諗緊去唔去好, 我到時先得5WK, 應該咩都睇唔到
其實我都而家仲係好驚, 成日都會有少少陰陰痛, 又未有咩反應, D人講到一CHECK 到就好唔舒服, 又會嘔, 又胃唔舒服, 我又好似仲未有反應, D人話反應越大, 個B越健康
睇醫生: $200 + $80驗孕

7 JUL 2011

 

 

 

 

10 JUL 2011

11 JUL 2011

 

 

 

 

腸胃炎 again

 

唉, 又腸胃炎了, 好唔開心, 有左以黎都第二次了, 尋日去左奶奶屋企打邊爐, 返到屋企已經覺得個胃好頂, 今朝起身都係覺得好辛苦啦, 先瀉左一次, 之後飲左杯水, 飲完就嘔左出黎, 嘔晒尋晚既野出黎, 即刻去睇醫生, 拎左聽日既假紙抖吓, 好辛苦, 我唔想陀住bb成日食藥呀~~