寶寶第一次打針

 

今日帶左寶寶去打第一針六合一同食預防輪狀病毒疫苗, 打針既時侯寶寶係瞓緊覺既, 我同老公又唔識叫醒佢先打, 寶寶瞓緊時俾人拮左一針, 即刻喊到拆天, 我見到佢喊成咁我都想喊呀, 之後就食埋預防輪狀病毒疫苗就閃得了, 姑娘話有機會會發燒, 俾定d退燒藥我哋, 點知今晚佢真係發燒呀, 燒到38.3度, 我哋餵佢食退燒藥時, 又係喊到拆天, 我好心痛呀~~

 

產後檢查 2

 

今日第2次產後檢查, 但係其實我d惡露都未清晒, 不過霍醫生幫我照超聲波就話見到應該清晒了, 少少就照唔到的, 佢本身上次話今次做抺片, 但之後又叫我自己出去做喎, 佢話無咩事就唔洗返黎檢查了~~

體重: 49.3kg = 108.46磅
診金: $500

寶寶第四次到健康院檢查

 

寶寶今日本應要到健康院打針既, 不過我哋有部份針join 左去私家打, 所以今日只係磅下重同見吓姑娘咋, 一個鐘就搞掂晒~~

今日體重: 3.62kg = 7.96磅

寶寶滿月啦

 

奶奶同我媽媽都用農曆計算, 寶寶今日滿月了, 今日朝早帶寶寶過老爺奶奶屋企拜祖先, 奶奶整左d紅雞蛋, 因為我哋諗住擺百日宴, 所以唔擺滿月了, 只係簡簡單單一家人o係屋企食左一餐飯~~

我哋幫寶寶剪左少少頭髮, 留黎做紀念~~

拎左出世紙啦

 

今日同老公幫寶寶拎左出世紙啦~~ 拎左2張copy, 每張$140~~

拎完同老公出左新城市行左一陣街, 點知忽然落好大雨呀, 好在o係商場咋, 我未坐完月唔揼得雨架~~ 仲諗住晏d同老公拎d薑醋返公司派, 咁大雨我唔去了, 要麻煩老公自己去了~~