寶寶第三次到健康院檢查

 

寶寶今日半個月大了, 又要返健康院, 主要係磅重, 因為佢出世時太細粒了, 今日磅重有2.81kg 了 = 6.182磅, 終於有6磅了, 雖然人哋可能出世都已經有呢個磅數了, 但我都好開心了, 寶寶有長大到, 你要加油呀~~ 姑娘見佢有重到就話無問題, 約下次再檢查同打針, 約左4月12日~~

產後檢查

 

唉, 今日又係咁啦, 約左十二點, 我差不多到診所時, 又收到姑娘電話, 話霍醫生又去左緊急開刀喎, 不過話今日會返, 叫我一係下晝2:30再黎過, 一係再約, 唔好玩野啦, 約過第二日陣間又話又有緊急開刀啦, 激死我呀, 根住就自己o係附近行, 我都唔想行, 開完刀都唔夠兩個禮拜, 迫我行兩個鐘街, 唉, 之後去左商務睇左一陣書就上返去座等, 激死.

霍醫生幫我照超聲波, 佢話d血差不多清晒了, 之後拆防水膠布, 話個傷口無咩問題, 不過個傷口仲係會痺痺哋, 跟住我同醫生講話個胸谷奶, 但係通唔到, 泵出黎又好少, 霍醫生就幫我按下, 佢都話仲未通得晒, 佢都話一定要用手先按得通, 同埋俾bb 啜先有用, 泵係通唔到的, 然後佢話約一個月後覆診, 到時做埋抺片檢查.

體重: 50kg = 110磅
診金: $500

寶寶十二朝&產後檢查(白行一趟)

 

今日寶寶十二朝了, 嫲嫲幫我哋o係佢屋企拜左神, 就可以派薑醋了.

本身約左今日三點去霍醫生度做產後檢查, 點知2:55分到去到診所樓下, 收到姑娘電話, 話霍醫生要幫人緊急開刀, 走左了, 叫我再約時間, 嘩激到我死呀, 黎到先話無得睇, 約左後日十二點, 唉~~

寶寶第二次到健康院檢查

 

隔左幾日, 又帶寶寶黎健康院檢查, 佢今日既重量係: 2.59kg = 5.698磅, 根住等叫名見醫生, 醫生幫bb check 黃, 話得70, 無黃, 無問題, 佢話bb keep 住重, 細粒d都無問題, 之後我又忍唔住喊了, 覺得點解自己令到bb 咁細粒, 醫生即刻遞紙巾俾我, 又安慰我, 話我哋兩公婆都唔係好大隻, 細粒都無問題, 最緊要健康, 佢話佢自己個bb 都好細粒的. 等我情緒平復左, 我就問醫生我寶寶唔肯埋身餵同埋啜兩下就瞓點算, 醫生話因為bb 食慣奶樽, d奶太快出, 所以佢會懶唔肯啜, 佢話一係就用杯仔同針筒餵bb飲奶, 同佢戒奶樽, 要好有心機囉, 迫佢肯埋身餵~~

之後就出去等見母乳姑娘, 我覺得呢個姑娘無之前個姑娘咁好心機,  又唔肯俾我老公一齊聽, 叫佢出去等, 放低寶寶o係床, 我同佢講bb 唔肯啜, 佢問我之後要唔要返工, 我話要, 佢話咁你不如泵或者手擠出黎囉, 求其講左兩句, 話擠之前沖個熱水涼, 或者搵熱毛巾敷下個胸, 擠完之後搵雪涷左既椰菜敷下, 連叫寶寶示範都無就話走得了, 不過又要下星期再黎過, 因為話醫生見寶寶細粒, 想睇下佢重得好唔好喎~~

寶寶第一次去健康院檢查

尋日打電話去健康院諗住約檢查, 但佢得電話錄音, 話walk in 去就得, 所以我今日就同老公同奶奶帶左寶寶去健康院檢查, 首先要填表, 根住等叫名去1號房磅重同check 黃, 要院晒衫的, 連尿片都唔可以有, 今日寶寶既重量係: 2.56kg = 5.632磅 黃疸指數: 105, 之後就出去等見姑娘, 姑娘會問吓你係咪餵母乳, 同產後情緒, 不過產後情緒真係會低落d, 真係好少事都會喊, 好似我老公見我哋湊bb 好lei hea, 話我哋唔識湊bb, 攞去佢家姐度湊, 佢可能只係講吓, 但我係可以喊到收唔到聲.  跟住我亞媽話我楂個奶樽都唔識楂, 我又會o係度勁喊, 然後餵人奶唔係好成功, 又會好唔開心, 覺得自己好無用. 

我呢一, 兩日開始谷奶, 谷到好痛, 又硬晒, 好似有兩個石頭o係心口咁, 姑娘幫我睇, 教我點樣按摩推返鬆個胸, 佢話我應該夠奶俾bb食, 但一定要推返鬆先, 同埋唔好著d有鋼線既胸圍, 唔係驚會谷到發燒有乳腺炎, 又教我點樣餵人奶姿勢, 抱埋寶寶入黎示範, 佢話寶寶係識啜的, 叫我俾心機, 健康院D姑娘真係好好人呀, 好有心機教我, 又約左星期四見人奶姑娘睇下情況有無進展, 之後出返去等見醫生. 醫生check 下 bb眼仔, 同d手腳仔話無咩問題, 一切正常~~

寶寶出生第四天 - 我哋出院啦

 

今日12點我哋就出院了, 老公今朝拎左我同寶寶出院d衫黎, 今日天氣涷左好多, 加上又落雨, 所以要著多d衫呀, 我戴埋冷帽添呀, 10點零鐘會計部打黎話計好數, 可以埋單了, 條數俾我預期既少, 俾左錢拎住d單就可以去接寶寶了, 姑娘話每四個鐘餵一次奶, 每餐75ml (2安半), 去到滿月最多餵90ml (3安)好了~~

今日老公同老爺奶奶接我同寶寶出院, 而我媽咪就晏d黎我屋企, 黎緊我媽咪會陪我坐月~~

寶寶出生後的第三天

今日一早霍醫生黎左巡房, 我咁啱去左厠所, 姑娘問我出唔出得黎話醫生到左, 既刻走出黎, 霍醫生仲讚我無用修腹帶都行得咁快, 個傷口其實都仲係痛, 都係靠止痛藥, 我問左醫生俾唔俾我早一日出院, 醫生話如果無問題就可以聽日出院了, 我見我同寶寶又無咩野, 兒科醫生報告寶寶一切正常, 大小便次數正常, 食奶都ok, 我哋決定早一日出院, 本身package 包五日四夜, 早一日走可以俾少2千, 咁我零願返屋企休息了.

今日都過得好充實, 夠鐘就去餵寶寶, 不過我未上奶, 都係俾佢每邊啜吓, 然後餵佢食奶粉, 同埋親子時間同老公一齊睇寶寶, 又有d 講座教點樣幫bb沖涼, 然後有d朋友黎探我哋, 應酬下, 好快又一日, 因為聽日出院, 夜晚8點就去聽個講座講下d出院需知, 同拎個禮品包, 都好多sample, 好啱洗~~

寶寶出生第二天

 

霍醫生今早巡房, 話今日可以抆尿喉,  去厠所要記錄每次去左幾多, 同埋試落床, 要座半個鐘先好開始行,  上落床o個下係好痛, 一定要有人扶, 同埋可能真係瞓左成日, 起身o個時個頭真係好暈, 不過為左可以見到寶寶, 點都頂硬上,  可以o係親子時間同餵奶時間見到寶寶了, 第一次見到同抱起佢時, 覺得好奇妙, 終於見到我的寶貝了, 佢真係好細粒, d手腳真係好幼呀~~

傷口仲係好痛, 要行得好慢, 我成日問姑娘攞止痛藥, 唔係個傷口會好痛~~

寶寶出世啦

 

約左7:30 做手術, 老公6:45到, 7:00前要換好手術袍, 等推入手術室, 7點零鐘被推入對資料, 等麻醉師簽名同意做麻醉手術.

好快開始麻醉, 要側住彎身打麻醉針, 我叫姑娘按實我唔好俾我郁, 好快就麻醉左, 感到下半身開始痺, 老公o係呢個時候入左黎陪我, 拖住我隻手, 而自己不知係涷,定緊張定麻醉既副作用, 身體不斷震, 之後手術室人員幫我插尿喉, 開始麻痺左, 有少少感覺, 然後手術好快就開始, 我同老公仲o係度傾緊計, 傾緊d無聊野, 無耐就聽到醫生話要推肚, 個麻醉師就推了幾下, 之後就聽到寶寶既喊聲, 好大聲, 但醫生話寶寶好細粒, 之後有姑娘清潔完就抱黎問我係仔定女, 又叫我鍚佢一啖, 員工幫我哋影相, 老公有剪肚臍帶. 我一直以為自己o係寶寶出世既時候一定會感動到喊, 但我竟然無, 可能因為成個過程真係好快好快, 好似發緊夢咁.  之後老公就俾人叫左出去, 我做埋手術就俾人推返出去, 我再見返老公, 就一齊上返房.

兒科醫生差不多7點先黎報告寶寶情況, 期間一直都好緊張, 點解醫生仲未黎講寶寶情況, 唔知會唔會有咩唔妥, 不過姑娘話如果有問題一定會一早講, 所以應該無咩野既, 寶寶出世只有2.52kg, 大概5磅半, 真係好細粒, 好唔開心呀, 我成39週幾先生, 足晒月架la 連6磅都冇, 真係好失望呀. 不過寶寶一切正常就好了, 遲d再養肥佢啦.

手術後4小時後開始恢復知覺, 覺得好痛, 但要6小時後先可以飲水才可以食止痛藥. 成日瞓左o係床度, 真係好痛, 姑娘話插住既鹽水o係有止痛, 但一樣好痛囉, 期間會有姑娘幫你清潔惡露, 換網衭, 要"緊"起身俾姑娘著時都好痛呀, 之後塞肛門止痛好d囉, 同一定要食止痛藥囉~~

聽日開刀啦

 

好緊張呀, 聽日開刀啦, 聽日就可以見到我的寶貝啦~~

因為我聽朝一早就要開刀, 所以仁安要求我今晚7:00 到入院, 老公今日請左半日假陪我入院, 雖然仁安已經包好多分娩用品, 產婦衛生巾, 網衭, 床墊, bb 尿片等等, 不過我都執左兩大袋野入院.

 

6點幾去到仁安, 就做入院手續, 我要求要同返香港人同房, 之後就安排上房, 我安排左住5樓4人房, 上房之前老公o係lobby 度等我, 我就去左做檢查, 磅重, 量血壓, 剃毛等. . . 姑娘又會問食邊隻奶粉同邊個兒科醫生, 本身想食思敏兒, 但原產地係日本, 最後都係揀左美素佳兒, 兒科醫生就揀左老公朋友介紹的李卓漢醫生.

開刀前8小時唔可以食野同飲水, 所以我同老公拿拿臨去醫院canteen 食飯, 食完飯返上房, 沖埋涼, 之後有姑娘幫我o係手背打點滴, 都幾痛呀, 因為我有b鏈, 霍醫生話打2支抗生素穩陣d, 老公陪到我10點幾佢就返屋企, 我就休息, 等待迎接寶寶聽日出世啦, 不過我都預左瞓唔著, 根本呢排已經瞓得唔好, 何況聽日開刀, 更加瞓唔著啦~~ 臨瞓前食埋胃藥, 就禁水禁食了. 寶寶, 我哋聽日就見面了, 今晚係你o係我肚裡面最後一晚了.

第七次私家產檢

 

38wk 4days 56.5kg = 126.5lb

應該係生之前最後一次產檢了。 今日約左10點40, 上到去已好多人等登記, 差不多11點登記完, 座左一陣就叫我名了, 真係估唔到, 俾埋錢12點走得了。 醫生今次check寶寶, 話佢今次有6.2lb 了, 希望出世唔止la.