亞仔已經六個月了, 想停餵人奶了, 我都估唔到自己可堅持餵到半年, 雖然一直都唔可以全人奶, 一日都係大概得兩, 三餐到, 但我相信有人奶可俾到D抗體佢, 就算少少都好, 所以我都堅持.
其實生之前, 我都無話好堅持一定要餵母乳, 只係諗住有奶就餵, 冇就食奶粉就算, 到啱啱生完時, 因為我係開刀生, 我都知唔會咁快上奶, 不過到我可落床時我都有俾佢啜, 不過我諗O個時我未上奶, 佢都啜唔到D乜, 咁每邊俾佢啜一陣之後, 就補奶粉了~~
到出院回家後, 就開始谷谷地奶了, 大概係生完第五, 六日到, 谷到非常之硬, 又非常之痛, 但係用泵就泵唔出, 得好少, 泵成半個鐘, 可能講緊係10-20ML 到, 之後帶亞仔去健康院檢查, D姑娘非常好, 又好有耐心教點餵BB姿勢最好, 又話我咁谷一定夠奶俾BB食, 即時令我對自己好有信心, 覺得我都可以餵到人奶的. 又幫我約母乳姑娘指導. 但佢話而家最緊要係整通佢先, 唔好俾佢塞, 唔係會有乳線炎的.
我姑奶生左兩個, 佢兩個都係餵母乳, 都好有經驗, 我就講左我既情況佢知, 佢就教我點按鬆佢, 按返通佢, 一定要非常大力, 真係痛到我暈, 之後直頭係我老公幫我按, 我O個時個胸係瘀晒的, 非常恐怖.
姑娘呀, 朋友呀都話要俾BB啜多D先會多D奶, 可惜我個仔可能真係食慣奶樽啦, 佢唔鐘意埋身餵, 啜兩啖就瞓, 當左我係人肉奶咀, 咁我就索性泵出來, 又可以睇到有幾多, 知道佢食幾多.
姑奶又教我要煲通草等佢通, 又煲上奶湯啦, 木瓜湯, 章魚黑豆湯啦, 但對我好似都無咩用,.
姑娘話一日要泵8次, 每隔3個鐘一次, 半夜都要起身泵, 頭o個一個月都係好少量, 每次都係泵到2-30ml 到, 泵幾次先夠亞仔食一餐, 同埋我發覺泵係泵唔清的, 無論電泵定手泵, 之後我索性用手擠, 反而擠得清, 但係. . .係擠到對手痛架囉, 後期就先用泵泵左頭o個浸, 再用手擠清, 真係好辛苦.
有諗過餵到返工就唔餵了, 仲要啱啱差不多返工時, 忽然試過左邊擠出血, 真係嚇死, 就諗, 唔通個天都想我唔好再餵, o個時就想放棄返工唔餵了, 之後又上網搵吓睇吓咩事啦, 開頭又驚係乳線炎之類, 但我又無發燒, 有乳線炎係會發咁啱o個幾日帶亞仔去打針, 就問健康院姑娘, 姑娘話係爆左微絲血管, 可能因為大力得滯, 咁我問姑娘仲可唔可以餵, 佢話無問題可以繼續,
到返工勒, 每日就拎住d冰袋, 奶杯, 一大袋返工, 每日lunch o係公司擠一次, 放工又無得出街, 要運d奶返屋企, 非常困身.
心諗一係餵到四個月啦, 到四個月時, 一日只係整到大概480ml 到, 都係夠2-3餐, 但我見佢又未收, 我都想繼續. 然後就諗, 一係餵到六個月啦.
到而家六個月了, 就開始由每日泵三次, 減為每日泵兩次, 返工前泵一次, 放工泵一次, 可能隔得耐先泵一次, 每次都有180-200ml, 夠亞仔食一餐, 我見仲可一日餵到兩餐佢食, 我又開始唔捨得停, 又諗, 不如餵到佢自己收奶先停啦. . . . 唔知最後我幾時先會放棄呢
沒有留言:
張貼留言